ZIARA YA MKUU WA WILAYA YA MISSENYI KATIKA KATA ZOTE 20

Posted on: March 7th, 2023

Mh. Mkuu wa Wilaya ya Missenyi Kanali Wilson Sakulo ameanza ziara yake leo terehe  07 Machi 2023 katika kata ya Ruzinga ambapo anatarajia kuzunguka katika kata zote 20 za halmashauri ya wilaya ya Missenyi ili kusikiliza na kutatua kero za wananchi kupitia mikutani ya hadhara.

Katika ziara hizo Kanali Sakulo ana ambatana na Kamati ya Usalama ya Wilaya, wataalamu mbalimbali kutoka taasisi za serikali kama vile TARURA, RUWASA, TFS na TANESCO pamoja na wakuu wa Divisheni na Vitengo kutoka Halmashauri ya Missenyi.

Katika ziara zake kwa kila kata ameaandaa utaratibu wa kufanya vikao vya ndani na watumishi wote ili kusikiliza na kutafuta ufumbuzi wa mambo mbalimbali wanayokutana nayo wakiwa kazini kutekeleza majukumu yao ya kisheria.

Akiwa katika Kata ya Ruzinga katika mkutano wa hadhara uliofanyika kati uwanja wa Umultunga uliopo nje ya ofisi ya Kata aliweza kusikiliza kero mbalimbali pamoja na kuzitolea ufumbuzi katika mkutano huo.

Baadhi ya mambo yaliyo ulizwa na wanachi walio wengi ni pamoja na kupelekwa umeme katika kitongoji cha  Busheza Kijiji Ruhija na baadhi ya maeneo mengine, Huduma ya Maji katika kata ya Ruzinga, Badhi ya barabara kuomba kufanyiwa matengenezo, utaratibu wa uuzwaji ardhi, manufaa ya hewa ya ukaa, mgogoro wa ardhi baina ya waislamu na Mzee Kamara, Pamoja na masuala ya utawala bora katika maneo ya vijiji haswa katika kufanya mikutano kwa mujibu wa taratibu za kisheria pamoja na wananchi kupewa haki ya kusikilizwa katika mikutano hio.

Maswali yote yalitolewa ufafafanuzi yakiwemo ya umeme ambapo kanali Sakulo alisema "Mhe. Rais wa Jamhuri ya muungano wa Tanzania Dk. Samia Suluhu Hassan anajitahidi kuhakikisha vijiji vyote vitatu vilivyo salia katika wilaya ya Missenyi vinapata umeme kisha awamu ya vitongoji itafuata hivyo wananchi wa Busheza wawe wavumilivu."

Mkuu wa Jeshi la Polisi Missenyi Marwa Mwita aliwasihi wananchi wa Ruzinga kuhakikisha wanafuata taratibu za sheria kwani kumekua na wananchi wanao anzisha maandamano bila kuomba kibali polisi na maandamano kama hayo ni batili.

Kwa upande wake mwenyekiti wa chama cha mapinduzi kata ya ruzinga Bw. Joseph Kamara alishukuru ujio wa mkuu wa wilaya kwani umesaidia sana katika kuleta suluhu ya mambo mengi kwa wananchi wa Ruzinga pamoja na kumuomba mkuu wa wilaya kurudi tena Ruzinga wakati mwingine.

Aidha wanachi wakati wakiwasilisha kero zao walimpongeza mkuu wa wilaya kwa kupanga ratiba ya kuwatembelea wananchi wake kwa kuwafikia walipo na kusikiliza kero na maono yao kwani wananchi walio wengi wanashindwa kufika wilayani kutokana na umbali.

Ziara hii imeanza kwa tarafa ya kiziba na hapo baadae itahamia katika tarafa ya missenyi na kata inayofuatia ni Kata ya Kitobo mnamo tarehe 09 Machi 2023 na Ziara katika tarafa ya Kiziba inatarajiwa kukamilika tarehe 23/03/2023 katika Kata ya Byango.