NANAUKA AIPONGEZA MISSENYI KUTAMBUA UMUHIMU WA VIJANA KATIKA UKUAJI WA UCHUMI

Posted on: January 26th, 2026

Waziri wa Nchi, Ofisi ya Rais Maendeleo ya Vijana Mhe. Joel Nanauka ameipongeza Halmashauri ya Wilaya ya Missenyi kwa namna inavyothamini na kutambua umuhimu wa Vijana katika maendeleo na ukuaji wa uchumi wa Taifa.

Akiwa katika ziara yake Wilayani Missenyi jana tarehe 25/01/2026 Waziri Nanauka ameipongeza Halmashauri kwa kuandaa programu za mafunzo kwa vijana zinazowasaidia kutatua changamoto za kiuchumi na kijamii zinazowakabili Vijana.

Sambamba na hilo, aliongezea kuwa amefurahishwa na suala la Halmashauri kuwa na Kanzi Data inayosaidia kutambua idadi ya Vijana wasio na ajira rasmi ndani ya Halmashauri na kuangalia namna bora ya kuwasaidia.

Aidha, alibainisha kuwa Mhe. Rais Dkt. Samia Suluhu Hassan amekusudia kuwainua Vijana kiuchumi huku moja ya ajenda yake ikiwa ni kuwatoa Vijana kuwa watu wanaofanya shughuli za uchuuzi na usambazaji na badala yake waingie katika uzalishaji na utekelezaji.

Kwa upande wake Kaimu Mkurugenzi Mtendaji wa Halmashauri ya Wilaya ya Missenyi Bi. Seraphina Rwegasira alieleza kuwa katika kutekeleza shughuli za maendeleo ya Vijana, jumla ya maeneo yenye ukubwa wa hekta 1,068 yametengwa kwaajili ya shughuli za kilimo kwa vijana. Huku akibainisha maeneo hayo kuwa ni Kyakakera lililopo Kata Kyaka hekta 163, Buturage lililopo Kata Bugandika hekta 631 na Kafunjo lililopo Kata Buyango hekta 274.

Aliongezea kuwa, makongamano 43 yaliyowahusisha Vijana 9,563 kutoka Kata zote 20 yameendeshwa katika Halmashauri ya Wilaya ya Missenyi na kuwawezesha Vijana kubainisha changamoto zinazowakabili na namna wanavyoweza kuzitatua kwa kutumia fursa za kiuchumi na kijamii zilizopo ndani na nje ya Wilaya.

Kwa upande wao Vijana Wilayani Missenyi wameishukuru Serikali ya Jamhuri ya Muungano wa Tanzania, pamoja na Ofisi ya Mkurugenzi Mtendaji wa Halmashauri ya Wilaya ya Missenyi kwa namna wanavyoendelea kuwapambania Vijana ili waweze kujikwamua kiuchumi.

Katika ziara hiyo Mhe. Waziri Joel Nanauka alitembelea Kiwanda cha Vijana cha Chaki (Missenyi Standard Chalks) na Kiwanda cha Vijana cha uzalishaji wa unga wa lishe (Missenyi Nutritional Flour Group) na kuona shughuli za uzalishaji zinazofanywa na vijana.

Ziara hiyo ilienda sambamba na zoezi la ugawaji wa vifaa kwa vijana kutoka makundi maalum ambapo vikundi 15 vilipokea vifaa hivyo ambavyo ni Cherehani 16 za kawaida, Mashine kubwa ya kukaushia nywele saluni (Dryer) 3, Mashine ndogo za kukaushia nywele saluni (Dryer) 7, Cherehani za kudarizi 3, Majiko matatu ya gesi, Mitungi mitatu ya gesi, Mashine moja ya kuchomelea vyuma na Mashine moja ya kutengeneza sweta.