DC MAIGA AWATAKA WAZAZI WASICHOKE KUWAPA WATOTO MLO KAMILI

Posted on: November 20th, 2025

Mkuu wa Wilaya ya Missenyi Mheshimiwa Kanali Mstaafu Hamis Maiga amewataka wazazi kuwapatia watoto wao mlo kamili bila kuchoka kwani mlo kamili huleta afya njema

Hayo yamesemwa katika maadhimisho ya siku ya lishe kitaifa yaliyofanyika katika shule ya msingi Bunazi 'A' katika kata ya Kassambya leo Novemba 20, 2025.

"Niwasihi wazazi tusichoke kuwapatia watoto wetu mlo kamili wenye makundi sita ya vyakula kwani lishe bora hulinda afya za watoto na kusaidia kuepukana na changamoto za utapiamlo" alisema DC Maiga.

Alisisitiza kwamba chakula kinacholiwa leo kina amua uwezo wa kusoma na kufikiri katika kutimiza ndoto za kesho pamoja na kuisihi jamii kuhakikisha inakula vizuri, kunywa maji ya kutosha sambamba na kushiriki kwenye michezo ili kujenga mwili imara na wenye afya.

Aidha, aliitaka jamii nzima kwa ujumla kupunguza ulaji wa sukari nyingi na vyakula vya kukaanga ambavyo vina madhara kwa afya za watoto na hata watu wazima.

Kwa upande wake Mganga mkuu wa Halmashauri ya Wilaya ya Missenyi Dkt. Daniel Chochole amesema kwamba serikali iliamua kuja na siku hii maalum ijulikanayo kama 'Siku ya Lishe Kitaifa' ili kukumbuka mafanikio na kuendeleza juhudi katika kukabiliana na matatizo yanayosababishwa na lishe duni.

"Utapiamlo wa aina yoyote ni tishio kwa maendeleo ya rasilimali watu na gharama kubwa zinazotokana na utapiamlo na magonjwa yasiyo ya kuambukiza ninkikwazo kwa uwekezaji katika elimu na afya" alisema Dkt. Chochole.

Maadhimisho haya hufanyika kila ifikapo tarehe 29 hadi 30 Mwezi Oktoba lakini kwa mwaka huu yalisogezwa mbele ili kupisha zoezi zima la Uchaguzi Mkuu wa Rais, Wabunge na Madiwani na majukwaa ya kuadhimisha siku hii kwa mwaka 2025 ni pamoja na shule, vyuo, katika maadhimisho ya siku ya afya ya lishe ya Kijiji pamoja na vyombo vya Habari.

Maadhimisho hayo yameambatana na zoezi la kuotesha miti ya matunda na kukagua mashamba kwa ajili mazao lishe kama Mahindi, maharage, Mboga za majani na Viazi lishe yanayolimwa katika shule za serikali kwa ajilia ya chakula cha wanafunzi.