BILIONI 3.4 ZA RAIS SAMIA KUTATUA CHANGAMOTO YA HUDUMA ZA AFYA WILYA YA MISSENYI

Posted on: October 16th, 2025

Na Salimu Ramadhani - MISSENYI DC

Katika kuimarisha huduma za Afya katika Wilaya ya Missenyi, Serikali ya awamu ya sita imetoa jumla ya shilingi bilioni 3.4 kwa ajili ya ujenzi wa Hospitali Mpya ya Wilaya ya Missenyi ili kuimarisha huduma za afya Wilayani humo.

Ujenzi wa Hospitali ya Wilaya umefikia asilimia 98 huku ukijujmuisha majengo 12 ambayo ni Jengo la Utawala, Upasuaji, Dawa,Kufulia,Maabara, Mionzi, Upasuaji, Jengo la Wagonjwa wa nje, Wagonjwa wa Dharura, Wodi ya Wanawake, Wanaume na Wodi ya Watoto.

Aidha, mpaka sasa Hospitali hio imeshapokea vifaa tiba vyenye thamani ya shilingi milioni 800, watumishi 39 na huduma za awali zimesha anza kutolewa.

Mkurugenzi Mtendaji wa Halmashauri ya Wilaya ya Missenyi Bw. John Paul Wanga akizungumza katika kikao kazi kilichoikutanisha Timu ya Menejimenti ya Halmashauri na kamati ya usimamizi wa huduma za Afya ngazi ya Wilaya (CHMT) alimpongeza Mhe. Rais wa Jamhuri ya Muungano wa Tanzania Dkt. Samia Suluhu Hassan kwa kutupatia fedha hizo kwa ajili ya ujenzi na ununuzi wa vifaa tiba ili kuboresha huduma za afya katika Wilaya ya Missenyi.

“Naishukuru sana Serikali ya awamu ya sita kwa kutatua changamoto ya kufuata huduma kwa umbali wa wastani wa kilomita 80 hapo awali hadi kufikia wastani wa kilomita 40 kwa sasa na hali hii itapunguza vifo vya mama na mtoto kutokana na kupatikana kwa huduma kubwa zaidi ambazo tulizikosa kwenye vituo vya afya.” Alisema Bw. Wanga

Aidha, Bw. Wanga aliwataka wataalam kuhakikisha wanasimamia Pamoja na kuweka mipango mizuri ili kuhakikisha huduma lengwa inamfikia mwananchi kama serikali ilivyokusudia.

Kwa upande wake Mganga mkuu wa Halmashauri ya Missenyi Dkt. Daniel Chochole alisema Hospitali yetu inatarajia kuhudumia wakazi wapatao 245,394 huku wakinufaika na uwepo wa huduma za upasuaji, kupungua kwa gharama za matibabu ukilinganisha na huduma walizokua wanapata katika Hospitali binafsi Pamoja na kupunguza vifo vya mama na mtoto vitokanavyo na uzazi.

Ikumbukwe kwamba hapo awali wananchi wa Wilaya ya Missenyi walikua wanapata Huduma za Hospitali ya Wilaya kutoka Hospitali Binafsi ya Mugana iliopo takribani kilomita 80 kutoka makao makuu ya Wilaya.