WADAU WA MAENDELEO MISSENYI WAPEWA ELIMU KUHUSU BIMA YA AFYA KWA WOTE

Posted on: January 13th, 2026

Leo Januari 13, 2026 Wadau wa maendeleo Wilayani Missenyi wameshiriki katika kikao kazi cha kujengeana uwezo na uelewa juu ya uanzishwaji wa Bima ya Afya kwa wote.

Akifungua kikao hicho kilichofanyika katika Ukumbi mkubwa wa Halmashauri, Mgeni rasmi ambae ni Mkuu wa Wilaya ya Missenyi Mhe. Kanali (Mst). Hamis Maiga amesema kwamba, uanzishwaji wa Bima ya Afya kwa wote ni hatua mojawapo katika uimarishaji wa sekta ya afya ambayo itasaidia kupunguza mzigo wa gharama matibabu kwa wananchi, kuongeza usawa katika upatikanaji wa huduma za afya na kuimarisha uendelevu wa mifumo ya ufadhili wa huduma za afya nchini.

Aidha, amewataka Wadau wakuu wa utekelezaji wa Sheria hii, hususan Mganga Mkuu wa Halmashauri, Waganga Wafawidhi wa Vituo vya kutolea huduma za afya na Wadau wote wa afya kuhakikisha wanajifunza, wanaelewa na kushirikiana katika kutekeleza mpango huu kwa manufaa ya wananchi.

Kwa upande wake Mwakilishi wa Meneja wa Mfuko wa Taifa wa Bima ya Afya (NHIF) Mkoa wa Kagera, Bw. Desderius Buhiye akiwasilisha Mpango wa Bima ya Afya kwa wote amesema kwamba, uanzishwaji na utekelezaji wa Mpango wa Bima ya Afya kwa wote, unatarajiwa kuanza rasmi mwezi Januari 2026 kwa awamu ya kwanza kwa makundi maalumu yasiyokuwa na uwezo yakiwemo ya wazee, watoto chini ya miaka 5, wajawazito na watu wenye ulemavu.

Aidha, ameongezea kuwa kuanzishwa kwa Bima ya Afya kwa wote ni sehemu ya utekelezaji wa Dira ya Taifa ya maendeleo 2025 - 2050 ya kuhakikisha kila Mtamzania anapata huduma Bora za Afya bila vikwazo vya kifedha.

Uanzishwaji na utekelezaji wa mpango wa Bima ya Afya kwa wote ni sehemu ya utekelezaji wa ahadi ya Mhe. Rais Dkt. Samia Suluhu Hassan ya siku 100 za kuimarisha huduma kwa wananchi.

Awali, Novemba 13, 2025, Rais Dkt. Samia Suluhu Hassan akilihutubia Bunge la Jamhuri ya Muungano wa Tanzania, alisema Serikali ilikuwa inajiandaa kuanza majaribio ya mfumo huo kama sehemu ya mageuzi makubwa ya sekta ya afya hapa nchini.