WALIMU MISSENYI WAPATIWA MAFUNZO KUWAHUDUMIA WANAFUNZI WENYE MAHITAJI MAALUM

Posted on: January 16th, 2026

Wakuu wa Shule na Walimu Walezi wa Wanafunzi wenye mahitaji maalum katika Shule za Sekondari Wilayani Missenyi, leo tarehe 16/01/2026 wamepatiwa mafunzo ya elimu jumuishi ya namna ya kuwahudumia Wanafunzi wote bila kujali tofauti zao za kimwili, kiakili, kijamii na kiuchumi katika Shule zao.

Akifungua mafunzo hayo katika Ukumbi mkubwa wa Halmashauri ya Wilaya ya Missenyi, Mkurugenzi Mtendaji wa Halmashauri Bw. John Paul Wanga amesema kwamba, mafunzo hayo yamelenga kuwakumbusha Walimu wajibu wao katika kuhakikisha kila mwanafunzi anapata fursa sawa ya kujifunza, bila kujali changamoto ya ujifunzaji aliyonayo mwanafunzi.

Ameongezea kuwa kupitia mafunzo hayo Walimu watajengewa uwezo kuhusu mbinu za ubainishaji na utambuzi wa Wanafunzi wenye ulemavu, na mbinu za utoaji wa afua stahiki kwa Wanafunzi wenye ulemavu.

Aidha, Bw. John Wanga amewaelekeza Wakuu wote wa Shule kuhakikisha kila Shule inafanya zoezi la ubainishaji na utambuzi wa Wanafunzi wenye mahitaji maalum kabla ya tarehe 31/03/2026.

Pia ameelekeza kila Shule ihakikishe Wanafunzi wenye mahitaji maalum wanapewa afua stahiki kama vile vifaa vya kujifunzia, madawati na miundombinu rafiki.

Kwa upande wake Afisa Elimu Sekondari Mwl. Morega Mongate ameahidi kusimamia na kuhakikisha Walimu waliopatiwa mafunzo wanatekeleza ipasavyo majukumu yao kwa kuzingatia yale yote waliyofundishwa katika mafunzo hayo.

Takwimu zinaonesha Wanafunzi wenye mahitaji maalum wanaosoma elimu ya Sekondari Wilayani Missenyi ni 79, kati ya hao Wanafunzi 58 wanasoma nje ya Halmashauri ya Wilaya ya Missenyi na 21 wanasoma katika Shule za Sekondari 31 zilipo ndani ya Halmashauri.

Aidha, wapo baadhi ya Wanafunzi wenye dalili za ulemavu katika Shule ambao hawajatambuliwa, hivyo katika kutatua changamoto hiyo na changamoto ya uhaba wa Wataalamu wa Elimu maalum, Halmashauri imeandaa mafunzo hayo kupitia Wataalamu waliopo ambapo kila Shule imewakilishwa na Walimu wawili.

Mafunzo hayo ya Elimu jumuishi yameenda sambamba na ziara ya mafunzo katika Kitengo cha Elimu maalum kilichopo Shule ya Msingi Bunazi, ambapo pia Walimu hao wametoa msaada wa vitu mbalimbali kwa Wanafunzi wenye mahitaji maalum katika Shule hiyo.