TUNAKAGUA MIRADI NA SIO KUTEMBELEA MIRADI

Posted on: January 27th, 2026

Mwenyekiti wa Halmashauri ya Wilaya ya Missenyi Mhe. Phocas Rwegasira ameendelea kusisitiza na kuwataka wasimamizi wa miradi ya maendeleo katika Halmashauri ya Wilaya ya Missenyi kuhakikisha wanazingatia ubora, thamani ya fedha na kubakiza fedha za miradi na sio kumaliza na kuomba kuongezewa fedha ili kukamilisha miradi.

Amesema hayo wakati wa ziara ya kwanza ya Kamati ya Fedha, Utawala na Mipango ya ukaguzi wa miradi ya maendeleo inayofanyika kwa siku mbili katika tarafa ya Kiziba na Missenyi kuanzia Januari 26 na 27, 2026 ambapo jumla ya miradi 12 yenye thamani ya shilingi bilioni 7.42 katika sekta za elimu na afya na uwekezaji imekaguliwa.

"Tunapokea fedha nyingi kutoka kwa Mheshimiwa Rais wa Jamhuri ya Muungano wa Tanzania Dkt Samia Suluhu Hassan hivyo tunapaswa kuzingatia ubora na vipimo sahihi kwa kuzingatia ramani na sio kujenga kwa mazoea na kushindwa kukamilisha mradi au kujenga chini ya kiwango". Alisema Mheshimiwa Phocas.

Katika ziara hiyo aliwataka pia wasimamizi wa miradi kuhakikisha fedha iliyotolewa inakamilisha mradi na kubakia kwani kuna baadhi ya vifaa kama vile mbao vinapatikana kwa bei nafuu ndani ya Mkoa wa Kagera ukilinganisha na Mikoa mingine kama Singida, Dodoma na maeneo mengine.

Aliongezea kuwa katika maeneo ya kutolea huduma panahitaji maboresho, hivyo fedha zinazobaki pindi mradi unapokamilika ni vyema kuomba kubadili matumizi yake na kuongeza miundombinu muhimu kama miundombinu ya kuhifadhi maji na umeme.

Hata hivyo alimuagiza Mhandisi wa ujenzi wa Halmashauri kuhakikisha vifaa vya kukagulia miradi pamoja na ramani za ujenzi vinakuwepo katika eneo la mradi wakati wa ukaguzi wa mradi.

Aidha, Wajumbe wa kamati walipongeza hatua za miradi iliyokaguliwa kwa kusimamiwa vizuri na kwa ubora.

Kwa upande wake Mkurugenzi Mtendaji wa Halmashauri ya Wilaya ya Missenyi Bw. John Paul Wanga aliwataka watekelezaji wa miradi kuzingatia maelekezo yanayotolewa na wataalamu pamoja na Ushauri wa kamati ili kukamilisha miradi kwa ubora na ndani ya muda kama walivyokubaliana.