WAZAZI WAHIMIZWA KUSHIRIKI KAMPENI YA UTOAJI WA MATONE YA VITAMINI A

Posted on: June 5th, 2025

Wazazi Wilayani Missenyi wahimizwa kujitokeza na kushiriki katika kampeni ya utoaji wa matone ya Vitamini A kwa watoto wote wenye umri kuanzia miezi 6 hadi 59.

Hayo yamesemwa na Katibu Tawala Wilaya ya Missenyi Bi. Mwanaid Mang'uro leo Juni 05, 2025 wakati wa ufunguzi wa Kampeni hiyo uliofanyika katika Kituo cha Afya Bunazi.

Katibu Tawala wa Wilaya ya Missenyi Akizungumza kwa niaba ya Mgeni rasmi katika hafla hiyo ambaye ni Mkuu wa Wilaya ya Missenyi Mhe. Kanali (Mst) Hamis Maiga, amewahimiza wazazi kujitokeza kwa wingi katika kampeni hiyo.

"Naomba niwahimize wazazi, walezi na hata majirani, toa taarifa, shiriki, saidia na tujitokeze kwa wingi kwenye kampeni hii ya utoaji wa Vitamini A, kwani ni jukumu letu sote kulinda afya ya mtoto wa Kitanzania", amesema Bi. Mwanaid.

Ameongezea kuwa ni vyema wazazi kuhakikisha watoto wao wanapata huduma hii ili kuwa na Taifa lenye afya njema na nguvu kazi ya badae.

"Kumbukeni, kinga ni bora kuliko tiba. Ni vyema tuchukue hatua leo kuwalinda watoto wetu dhidi ya maradhi ya kesho, endapo tukikumbatia kampeni hii kwa pamoja, tutakuwa tumeweka msingi thabiti wa Taifa lenye afya njema na nguvu kazi ya badae", ameongezea Bi. Mwanaid.

Awali akizungumza katika ufunguzi huo Mkurugenzi Mtendaji wa Halmashauri ya Wilaya ya Missenyi Bw. John Paul Wanga amewataka wazazi waliofika katika ufunguzi wa kampeni hiyo kuwa mabalozi wazuri wa kuwahimiza wenzao kushiriki pia katika kampeni hiyo.

"Niwaombe sana ndugu zangu nyinyi mliofika kwa uwakilishi wa Wanamama wengine ambao wako nyumbani, basi mkitoka hapa mkawe Mabalozi wa kuwahamasisha na wao waweze kushiriki vyema", amesema Bw. John Wanga.

Kampeni hii ya siku 30 iliyoanza rasmi Juni 01, 2025 itahusisha utoaji wa matone ya ziada ya Vitamini A, dawa za minyoo ya tumbo na upimaji wa hali ya lishe kwa watoto wote wenye umri kuanzia miezi 6 hadi 59, na huduma zote zinatolewa bure katika vituo vyote vya kutolea huduma za Afya.