WATAALAMU WA MIFUGO, WAFUGAJI WAJENGEWA UWEZO

Posted on: May 18th, 2018

Wataalamu wa mifugo wilayani hapa wamejengewa uwezo wa namna bora ya ufugaji wa ng’ombe wa maziwa. Mafunzo hayo yanayofadhiliwa na mradi wa North South Trans-border Project (NSTP)yamefanywa na wataalamu Ndg Gidi Smolder na Ndg. Yvonne Robber Kutoka Nchi ya Uholanzi. 

Mafunzo hayo yamefanyika kwa siku nne mfululizo yakihusisha  wataalamu wa mifugo waliopo makao makuu ya wilaya, wataalamu wa mifugo wa kata na vijiji, wawakilishi wa mitandao ya wafugaji wa tarafa za Missenyi na Kiziba pamoja na baadhi ya wafugaji waliopata fursa hiyo.  Aidha, mafunzo hayo yamefanyika kwa siku mbili mfululizo katika eneo la Bunazi kwa kata za Kassambya, Minziro, Mutukula, Kyaka na Kilimilile na siku mbili mfulululizo katika kituo cha rasilimali za wakulima Kitobo kwa Kata za Kitobo, Bwanjai, Buyango, Ishozi, Ishunju na Gera.

Wakiwa katika vituo mbalimbali vya mafunzo , wafugaji wamepewa mafunzo mbalimbali yaliyohusu  njia bora za ufugaji wa ng’ombe wa maziwa kwa lengo la kufanya kifanya ufugaji wa kibiashara. “Tumefarahia sana ujio wa wataalamu hawa, tumepata elimu ambayo hatukuwa nayo hapo kabla… ndio pamoja na changamoto ya lugha lakini nimepata kitu.”  Alisikika akisema mmoja wa wakilishi wa mtandao wa wafugaji wanawake Missenyi. Pia wafugaji hao hawakusita kuzitaja baadhi ya changamoto zinazowakabili wafugaji katika eneo la Missenyi ni  uhaba wa malisho ya mifugo.

Wakizungumza na tovuti hii, mara baada ya mafunzo hayo wakufunzi wamewataka wafugaji waliopo katika wilaya hii kuitumia vizuri fursa ya hali ya hewa rafiki kwa mifugo iliyopo katika eneo la missenyi kwa kufanya ufugaji bora na wakisasa wa ng’ombe wa maziwa na pia kutambua wataalamu waliopo na kuwatumia ipasavyo. “Maeneo haya yana kijani cha kutosha, maeneo yote Kagera na hapa Missenyi hali ya hewa yake ni rafiki kwa mifugo sio kama sehemu zingine, wafugaji wa maeneo haya wanachohitaji ni elimu tu na si kungine…hata wewe nakushauri kama huna mifugo fikiria kufuga” alisema Ndg. Gidi Smolder . 

Nae mtaalamu wa Mifugo kutoka kutoka makao makuu ya Wilaya ndugu Jasson Rwazo hakusita kutaja changamoto inayo wakabili wafugaji ni pamoja na Wafugaji kutumia majani ya asili yasiyo na virutubisho vya kutosha hivyo kusababisha ng’ombe kutoingia katika joto kwa wakati na uzalishaji wa maziwa kupungua huku gharama za utunzaji zikibaki kuwa kubwa. Sambamba na hilo amewataka wafugaji wa eneo hili wafuge kibiashara kwa kutumia mbinu bora za ufugaji wa kisasa na wasifuge kimazoea. “Pamoja na changamoto walizonazo, wafugaji wetu wanatakiwa wabadilike, waache kufuga ili mradi wanafuga wanatakiwa wawekeze katika ufugaji ili waone faida zake” alimalizia Bwana Rwazo.