WANANCHI MISSENYI WAASWA KUENZI MUUNGANO KWA VITENDO

Posted on: April 26th, 2025

Wananchi Wilayani Missenyi, Mkoani Kagera waaswa kuenzi Muungano wa Tanganyika na Zanzibar kwa vitendo kwa kukemea dalili zozote zenye nia ya kuuvunja muungano.

Hayo yamesemwa na Mkuu wa Wilaya ya Missenyi Mhe. Kanali (Mst) Hamis Maiga leo Aprili 26, 2025 wakati wa maadhimisho ya sherehe ya miaka 61 ya Jamhuri ya Muungano wa Tanzania.

"Wananchi sote kwa pamoja na kila mpenda maendeleo, kila mtu kwa nafasi yake anatakiwa kuenzi Muungano huu kwa vitendo kwa kukemea dalili zozote zenye nia ya kuuvunja muungano huu". Amesema Mhe. Maiga.

Ameongezea kuwa njia moja wapo ya kuwaenzi Waasisi wa Muungano wa Tanganyika na Zanzibar ni kuudumisha muungano ambao ni urithi wa aina yake waliotuachia Waasisi wa muungano huu.

Aidha, amewataka Wanamissenyi na Watanzania wote nchini kuuenzi Muungano kwa kufanya kazi kwa bidii na kuacha utendaji wa mazoea.

"Watanzania inatupasa tuuenzi Muungano wetu kwa kufanya kazi kwa bidii, ubunifu, kujitolea na kuacha utendaji wa mazoea, tuadhimishe miaka 61 ya Muungano kwa kuudumisha na kufanya kazi kwa bidii". Amesema Mhe. Maiga.

Kwa upande wake Mwenyekiti wa Halmashauri ya Wilaya ya Missenyi Mhe. Projestus Tegamaisho amewataka Wanamissenyi kutumia Muungano huu kama fursa ya kukua kiuchumi hasa kwa wafanyabiashara.

"Wanamissenyi tembeeni mpaka Zanzibar kule kuna bidhaa za ajabu, kwahiyo tunaweza tukawa na bidhaa kutoka Zanzibar katika Gulio letu la Bunazi zikaenda mpaka Uganda na maeneo mengine bila kutegemea Uganda kuleta huku kila siku". Amesema Mhe. Tegamaisho.

Maadhimisho haya ya sherehe ya miaka 61 ya Jamhuri ya Muungano wa Tanzania, Wilayani Missenyi yamefanyika katika viwanja vya Gulio la Bunazi yakiambatana na shughuli mbalimbali ikiwa ni pamoja na upandaji miti katika Shule ya Msingi Bunazi 'B', matembezi ya amani ya Muungano, usafi wa mazingira katika Gulio la Bunazi, mashindano ya uandishi wa Insha kwa wanafunzi, pamoja na mashindano ya mpira wa miguu.

Aidha, kauli mbiu ya maadhimisho haya kwa mwaka 2025 inasema; Miaka 61 ya Jamhuri ya Muungano wa Tanzania. "Muungano wetu ni Dhamana, Heshima na Tunu ya Taifa Shiriki Uchaguzi Mkuu wa Mwaka 2025".