UFUNGUZI SOKO LA NDIZI NA STENDI GERA, NEEMA KWA WANANCHI WILAYANI MISSENYI

Posted on: May 31st, 2025

Leo Mei 31, 2025 Halmashauri ya Wilaya ya Missenyi imefungua rasmi Soko la ndizi na Kituo cha mabasi madogo Gera ikiwa na lengo la kusogeza huduma kwa wananchi na kuwasaidia kuendesha soko kwa ajili ya mazao mbalimbali ya kilimo na mifugo na kuongeza pato la mwananchi.

Akisoma taarifa ya mradi huo kwa niaba ya Mkurugenzi Mtendaji wa Halmashauri ya Wilaya ya Missenyi, Afisa Mipango wa Halmashauri Bw. Julian Tarimo amesema kwamba, katika mwaka wa fedha 2022/2023 Halmashauri katika jitihada zake za kuongeza mapato ilibuni na kuanzisha miradi ya kimkakati mmoja wapo ukiwa mradi wa Soko la ndizi na stendi katika Kata ya Gera.

Ambapo katika mwaka wa fedha 2023/2024 na 2024/2025 Halmashauri ilitenga Shilingi Milioni 45.5 kwa ajili ya kuanza mradi huo.

Ameongezea kuwa utekelezaji wa mradi huo umehusisha shughuli mbalimbali ikiwa ni pamoja na kulipa fidia ya shamba na makabuli manne yaliyokuwa katika eneo husika, usafishaji, usawazishaji, uwekaji kifusi, ushindiliaji, ujenzi wa karavati 2, ujenzi wa mtaro wa maji na ujenzi wa choo matundu 4 na uvutaji wa maji kufika eneo la mradi kwa ajili ya matumizi ya choo na wananchi vimefanyika hadi kufikia hali hii inayoonekana kwa sasa.

Kwa upande wake Mgeni rasmi katika ufunguzi huo ambaye ni Mwenyekiti wa Halmashauri ya Wilaya ya Missenyi Mhe. Projestus Tegamaisho amemshukuru Diwani Kata ya Gera Mhe. Henry Bitegeko kwa kuwa mstari wa mbele katika kufuatilia utekelezaji wa mradi huo.

Aidha, amewataka wananchi wa Kata ya Gera kuzalisha mazao ya kutosha na kukuza soko.

"Tumekuja kufungua soko hili na tunategemea lifanye kazi, hivyo jiandaeni kuzalisha mazao ya kutosha na kugeuza soko hili liwe kama mnavyoona soko la Bunazi", amesema Tegamaisho.

Pia, amemtaka Mkurugenzi Mtendaji wa Halmashauri kuhakikisha uwekaji taa za sola katika soko hilo unafanyika kwa haraka.

"Yapo mengi Wafanyabiashara wameyasema, nadhani Kaimu Mkurugenzi cha kwanza wakati mnashughulikia kuleta umeme, tuanze na sola za haraka hapa, tuondoe giza ili watu wafanye kazi muda wote", ameongezea Tegamaisho.

Akitoa shukrani zake kwa wananchi waliojitokeza katika ufunguzi wa soko hilo Diwani Kata ya Gera Mhe. Henry Bitegeko amemshukuru Mwenyekiti na Halmashauri kwa ujumla kwa kuwapa mradi huo wananchi wa Kata ya Gera.

"Haya ni matunda ya ubunifu wako kwa kuendelea kuongeza vyanzo vya mapato ili kuleta unafuu wa maisha kwa Wanamissenyi na Wanagera kwa ujumla, tunashukuru sana", amesema Bitegeko.

Ufunguzi wa Soko la ndizi na stendi Gera ni fursa kwa wakazi wa Kata ya Gera, na Kata jilani za Kanyigo, Bwanjai, Kashenye, Ishunju na Ishozi.

Aidha, pamoja na shughuli zilizotekelezwa bado yapo mambo yanayotarajiwa kufanyika ili kuboresha Soko na kituo cha mabasi madogo ambayo ni ujenzi wa banda moja la ndizi na uwekaji wa taa mbili za sola kama mkakati wa muda mfupi wa kupata mwanga kabla ya kufuatilia uvutaji wa umeme wa TANESCO.