MPE MWANAO MATONE UOKOE MAISHA YAKE

Posted on: August 31st, 2022

Katika kuunga mkono jitihada za serikali ya Jamhuri ya Muungano wa Tanzania chini ya Wizara ya Afya  katika kudhibiti  ugonjwa wa polio, kuanzia tarehe 01 Septemba 2022 hadi 04 Septemba 2022 itafanyika kampeni ya awamu ya tatu ya kitaifa kwa watoto chini ya miaka mitano ili kuwakinga na ugonjwa wa Polio.

Katika Wilaya ya Missenyi hali ya uchanjaji chanjo ya Polio kwa Watoto chini ya miaka 5 awamu iliyopita iliyofanyika kuanzia tarehe 18 Mei 2022 hadi 22 Agosti 2022 tulifanikiwa kuchanja jumla ya watoto 55,277 sawa na asilimia 119.5 ambapo lengo lilikua ni kuwafikia watoto 46,257 kwa muda wa siku tano.

Kwa mujibu wa Maelezo ya Mganga Mkuu Wilaya ya Missenyi Ndg Daniel Chochole alisema kwamba awamu hii chanjo ya Polio inawahusu watoto wote walio chini ya umri wa miaka mitano wakiwemo wale waliochanja katika kampeni iliopita kwasababu hii ni nyongeza ya chanjo ya awali ili kuendelea kuimarisha uwezo wa kinga.

Amesisitiza kwamba watoto wote chini ya umri wa miaka mitano wanapaswa kuchanjwa kwani moja ya madhara ya ugonjwa huu ni kushambulia mfumo fahamu na kumuachia mtoto ulemavu wa kudumu au hata kupelekea kifo.

“Chanjo hii sio mpya ni sawa na chanjo inayotolewa siku zote na  hutolewa bure bila gharama yeyote hivyo wananchi wajitokeze kwa wingi kama walivyohamasika awali.” Alisema Chochole.

Kwa upande wake mratibu wa chanjo ya Polio Wilaya ya Missenyi Bw. Edward Kagari alisema Ugonjwa wa Polio umekuwa tishio kwa miaka mingi katika nchi nyingi duniani ikiwemo nchi ya TanzaniaKwa mara ya mwisho Tanzania ilipata mgonjwa wa Polio mwezi Julai 1996.

Katika siku za karibuni nchi ya Malawi ilitoa taarifa ya mgonjwa wa Polio mnamo tarehe 17 Februari 2022 na Mgonjwa huyo alipatikana katika mji mkuu wa Malawi unaojulikana kama Lilongwe.

Hadi kufikia mwezi wa sita 2022 ugonjwa wa polio umeendelea kusambaa katika nchi za Msumbiji na Zimbabwe hivyo kutokana na mwingiliano wa wananchi baina ya Tanzania na Malawi, Msumbiji na Zimbabwe kutokana na tathmini iliyofanyika na Wizara ya Afya na Shirika la Afya Duniani (WHO), nchi yetu ilionekana kuwa miongoni mwa nchi zilizo katika hatari kubwa ya kupata maambukizi ya ugonjwa wa polio endapo hatua madhubuti hazitachukuliwa.

Utolewaji wa chanjo hii katika wilaya ya Missenyi unaotarajiwa kuanza kesho utafanyika kwa kupita huduma tembezi yaani nyumba hadi nyumba kwa muda siku nne mfululizo katika Wilaya nzima kwa kutumia wachanjaji waliopangwa katika vitongoji vyote 356 vya wilaya ya Missenyi.