MAADHIMISHO YA SIKU YA WAUGUZI DUNIANI YAFANA MISSENYI

Posted on: May 16th, 2025

Leo Mei 16, 2025 Halmashauri ya Wilaya ya Missenyi imeadhimisha siku ya Wauguzi Duniani ambayo huadhimishwa kila mwaka tarehe 12 ya Mwezi Mei Duniani kote.

Akizungumza katika sherehe za maadhimisho hayo zilizofanyika katika Ukumbi wa Nyabutaizi uliopo Wilayani Missenyi, Muuguzi Mkuu wa Wilaya ya Missenyi Bi. Lucia Eustace amesema kwamba Siku ya Wauguzi Duniani ni siku muhimu Duniani kote ambapo wanatambua, kuthamini na kusherehekea mchango mkubwa wa Wauguzi katika Wilaya ya Missenyi, Taifa la Tanzania na Dunia nzima kwa ujumla.

Ameongezea kuwa kauli mbiu ya mwaka huu isemayo "Uuguzi Nguvu ya Mabadiliko" inaakisi mchango mkubwa unaotolewa na Wauguzi na kuwataka waendelee kuzingatia maadili ya taaluma yao.

"Katika sekta ya Afya inayofanya shughuli za kinga na tiba asilimia 80 ni nguvu ya Wauguzi, kwahiyo kauli mbiu tunayotembea nayo mwaka huu tuna imani Wauguzi wakibaki ndani ya maadili ya taaluma yao na maadili ya utumishi, tuna imani pia taaluma zote za kada ya Afya wataenda kubadilika kwa kutoa huduma bora kwa mteja", amesema Bi. Lucia.

Kwa upande wake Mgeni rasmi katika sherehe za maadhimisho hayo ambaye ni Mkuu wa Wilaya ya Missenyi Mhe. Kanali (Mst) Hamis Maiga amesema kwamba maadhimisho ya Siku ya Wauguzi huadhimishwa tarehe 12 Mei kila mwaka Duniani kote, lakini kutokana na mwingiliano wa kazi Halmashauri ya Wilaya ya Missenyi inafanya maadhimisho haya muhimu kwa Wauguzi leo Mei 16, 2025.

Pia, amewataka Wauguzi kuifanya siku hii kuwa ndio mwaka mpya wa kiuguzi kwa kufanya kazi kwa kuzingatia viapo vyao.

"Katika siku hii ya leo uwe ndio mwaka mpya wa kiuguzi wa kufanya kazi kwa kuzingatia viapo vyenu kwa upendo, kujituma, kujitolea, ubunifu na kuacha kufanya kazi kwa mazoea ili kutoa huduma inayokusudiwa kwa kuepuka mambo yote yanayoharibu taswira ya utoaji huduma bora na zenye staha", amesema Mhe. Maiga.

Aidha, kwa upande wake Kaimu Mkurugenzi Mtendaji wa Halmashauri ya Wilaya ya Missenyi Bw. Egidius Kahendaguza amewataka Wauguzi kuwa wema na si wabaya kwa wanaowahudumia.

"Msikubali kuwa katika upande wa Wauguzi wabaya, tukiwa kwenye njia ya Wauguzi wema watu wote watapata faraja na Mwenyezi Mungu atajidhihirisha uponyaji utafanyika na maisha yataendelea", amesema Bw. Kahendaguza.

Akitoa neno la shukrani Kaimu Mganga Mkuu Wilaya ya Missenyi Dkt. Jamily Yahaya amesema kuwa Halmashauri inatambua umuhimu wa Wauguzi na inawatambua kama Wauguzi kama moyo wa Idara ya Afya.

Ameongezea kuwa Halmashauri itaendelea kusimamia stahiki za Wauguzi na maadili ya Wauguzi katika kazi.

"Sisi kama Halmashauri tutaendelea kusimamia stahiki zenu Wauguzi lakini pia tutaendelea kuwasimamia na kuwaelekeza katika kukumbushana umuhimu wa maadili ya taaluma zetu lakini pia mafunzo mbalimbali ili kujengeana ujuzi", amesema Dkt. Jamily.

Maadhimisho haya hufanyika kila mwaka Mei 12, Duniani kote ikiwa ni kumbukumbu kwa muasisi wa huduma ya Uuguzi Florence Nightngale ambaye alikuwa Muitaliano aliyezaliwa mwaka 1871.

Kwa mwaka huu 2025 maadhimisho ya siku ya Wauguzi Wilayani Missenyi yameambatana na shughuli mbalimbali ikiwa ni pamoja na utoaji wa vyeti na zawadi kwa Wauguzi wastaafu na Wafanyakazi bora katika kada ya Uuguzi, kuwatembelea wagonjwa katika Kituo cha Afya Bunazi, pia matembezi ya amani na burudani mbalimbali.