LAAC YAPONGEZA UBORA MIUNDOMBINU YA HOSPITALI YA WILAYA YA MISSENYI

Posted on: March 17th, 2024

Kamati ya bunge ya hesabu za Serikali za Mitaa (LAAC) leo tarehe 17 Machi, 2024 imefanya ziara ya siku moja kwa ajili ya ukaguzi wa miradi miwili inayoendelea kujengwa ambayo Mradi wa ujenzi wa hospitali ya Wilaya ya Missenyi na ujenzi wa shule ya sekondari Kitobo.

Katika ukaguzi huo kamati imepongeza hatua nzuri zilizofikiwa pamoja na kupongeza usimamizi mzuri wa ujenzi wa miundombinu uliokidhi ubora na viwango katika ujenzi wa majengo ya Hospitali ya Wilaya ya Missenyi na thamani ya fedha inaonekana.

Aidha kamati hio inayoongozwa na Makamu Mwenyekiti wa kamati ya bunge ya hesabu za serikali za Mitaa Mhe. Stanslaus Mabula imeagiza kuhakikisha maeneo yote yaliyojengwa miradi hio miwili yanafanyiwa tathmini ya kimazingira ili kuwa na uhakika juu ya kudumu kwa miundombinu inayojengwa na serikali katika maeneo hayo.

Akiongoza kikao cha Kamati hio kwaniaba ya makamu mwenyekiti, Mhe. Daimu Mpakate ambaye ni Mbunge wa Tunduru Kusini ameitaka Halmashauri ya Wilaya ya Missenyi kuandikia barua Ofisi ya Rais TAMISEMI ili kuwaomba wakati wa utekelezaji wa miradi waweze kupatiwa kiasi cha fedha tofauti na Halmashauri zingine kwani kulingana na mazingira ya Missenyi inabidi utumie gharama nyingi tofauti na maeneo mengine katika Msingi wa nyumba pamoja na kuongeza ubora ili kukabiliana na athari zitokanazo na tetemeko la ardhi.

‘’Hakikisheni mnatumia mapato ya ndani pia kukamilisha ujenzi wa miradi mbalimbali kama shule ya Sekondari Kitobo na Hospitali ya Wilaya ya Missenyi ili majengo yatumike ipasavyo kutoa huduma kwa jamii kama ilivyokusudiwa’’ Alisema Mhe. Mpakate.

Mpakate pia ameishauri Halmashauri ya Wilaya ya Missenyi kwaniaba ya Kamati hiyo kuhakikisha wanasimamia miradi ya maendeleo kikamilifu ili kiwango cha fedha kinachotumika kiendane na ubora wa majengo yanayojengwa kama ilivyofanyika vizuri katika Ujenzi wa Hospitali ya Wilaya ya Missenyi.

Aidha, Kamati ya Hesabu za Serikali za Mitaa imetoa siku moja kwa Halmashauri zote za Mkoa wa Kagera kuainisha madai yote ya vifaa na vifaa tiba wanavyovidai katika Bohari Kuu ya Dawa (MSD) kwani katika maeneo mengi waliyoyatembele wamekuta madai ya vifaa na vifaa tiba vya thamani kubwa na vyenye muda mrefu bila kufikishwa maeneo husika.

“Niangize halmashauri zote za Mkoa wa Kagera kuainisha madai yote wanayodai MSD hadi ifikapo kesho wakati wa kufanya majumuisho ili kamati ijiridhishe na kuelekeza yashughulikiwe kwa wakati.” Alisema Mhe. Mabula.

Kwa upande wake Meneja wa MSD Kanda ya Kagera Kalendero Masatu amesema, MSD imefanya maboresho makubwa ya kusambaza bidhaa za afya ambazo halmashauri za mkoa wa Kagera zinaidai MSD kuanzia mwaka 2021/23.

Naye, Naibu Katibu Mkuu Ofisi ya Rais-TAMISEMI anayeshughulikia afya Dkt.Charles Mahera amesema TAMISEMI itaendelea kuzisimamia Mamlaka za Serikali za Mitaa nchi nzima ili ziweze kukamilisha miradi kwa wakati na kwa ubora unaotakiwa ili thamani ya fedha iendane na miradi inayotekelezwa.

Kamati hii imefanya ziara ya siku moja katika wilaya ya Missenyi ambapo Wilaya ya Missenyi imeipokea kamati hii kutoka Halmashauri ya Wilaya ya Bukoba na siku ya terehe 18 Machi, 2024 kamati hio inaendelea na ziara yake katika Halmashauri ya Manispaa ya Bukoba.