KATIBU MKUU WIZARA YA MAJI AZINDUA RASMI UJENZI WA MRADI WA MAJI WA KYAKA-BUNAZI

Posted on: June 1st, 2020

Katibu Mkuu  wizara ya Maji Prof. Kitila Mkumbo amezindua rasmi ujenzi wa mradi wa maji wa Kyaka-Bunazi unaotegemewa kuanza hivi karibuni. Akiongea na wadau mbalimbali waliohudhuria hafla hiyo katika Ukumbi wa William Katunzi uliopo wilayani hapa, katibu mkuu amesema amepata furaha ya pekee kuzindua mradi huu mkubwa ukiwa ni mradi wa kwanza Tanzania unaotumia maji ya Mto kagera.

Mradi huu wa unatarajiwa kutumia kiasi cha Tsh. Bilioni 15.1 zote zikiwa ni fedha za ndani ambapo kiasi cha Tsh. Milioni 650 zimeshatengwa tayari. Mradi huu ni moja ya miradi ipatayo 10 inayotekelezwa katika miji 13 ya kanda ya ziwa.

Katibu mkuu hakusita kuelezea umuhimu wa mradi huu kwa kutaja sababu kuu tatu zilizopelekea kutekeleza mradi huu ambazo ni Miji ya Kyaka na Bunazi kutokuwa na maji kabisa, pili kutekeleza agizo la Rais wa Jamuhuri ya Muungano wa Tanzania Mh. John Joseph Pombe Magufuri na tatu hali ya mradi huu kuwa wa kwanza wa Serikali kutumia maji yamto Kagera.

Katika utekelezaji wa mradi huu, katibu mkuu amesema hatua za ujenzi wa mradi umegawanyika katika hatua kuu mbili ambapo hatua ya kwanza itahusisha shughuri kama ujenzi wa chanzo cha maji, ujenzi wa tenki kubwa la maji, kutengeneza mtambo wa kuchuja na kusafisha maji pamoja na kutandaza bomba kutoka kwenye chanzo kwenda kwenye tanki. Hatua hii inataraji kugharimu kiasi cha Tsh. Bilioni 9.4. Hatua ya pili itahusisha ujenzi wa mtandao wa usambazaji wa maji kwa wananchi kutoka kwenye tanki kuu ambapo hatua hii itagharimu kiasi cha Tsh. Bilioni 5.7

Mwenyekiti wa Halmashauri ya wilaya ya Missenyi ambaye pia ni Diwani wa kata ya Kyaka Mh. Projestus Tegamaisho amekiri kupokea mradi huu kwa namna ya pekee huku akiwataka wananchi wa Kyaka na vitongoji vyake kuupokea na kuulinda kwa nguvu zao zote  kwani si tu utamtua mwanamke ndoo kichwani bali ni fursa kwao pia kwa kuwa utawainua kiuchumi kutokana na matumizi ya maji katika kilimo na shughuli mbalimbali za kijamii huku akiimwagia sifa serikali ya awamu ya Tano kuwa ndio serikali ambayo imevunja rekodi kwa kufanikisha kupeleka maji kwa wananchi kutoka mto Kagera.

Naye Mkurugenzi mtendaji wa Halmashauri ya Wilaya ya Missenyi ndugu Innocent Mukandala ameishukuru Serikali kwa kuruhusu utekelezaji wa mradi huu kwani utakuwa suluhisho kubwa la tatizo la maji katika maeneo yote yatakayofikiwa na mradi kwani kwa sasa hali ya mtandao wa maji kwa Wilaya ya Missenyi ni asilimia 62 huku akiwashukuru pia wadau wa maendeleo kama World vision kwa kutekeleza miradi mbalimbali ya maji vijijini.

Katika hatua nyingine, Mwenyekiti wa kijiji cha Bulifani ambacho ndipo patakaopjengwa chanzo kikuu cha maji ameishukuru serikali kwa kuleta mradi huu mkubwa katika maeneo hayo huku akimuomba mkandarasi aliyepewa kazi ya ujenzi kutumia vijana wa maeneo yanayozunguka mradi na si kuleta watu kutoka nje hata kwa kazi wanazoweza kufanya.