BARAZA LA MADIWANI MISSENYI LAANZA ZIARA YAKE KATIKA MIKOA YA SONGWE NA MBEYA

Posted on: March 3rd, 2025

Baraza la Madiwani katika Halmashauri ya Wilaya ya Missenyi leo tarehe 03 Machi, 2025 limeanza ziara yake ya kikazi Mkoani Songwe katika Wilaya ya Momba yenye Halmashauri za Momba na Halmashauri ya Mji wa Tunduma na Mkoa wa Mbeya katika Halmashauri ya Jiji la Mbeya kwa ajili ya mafunzo ya njia mbalimbali za kuongeza mapato ya Halmashauri.

Akizunguza wakati wa kuanza ziara hio mapema leo,  Mwenyekiti wa Halmashauri ya Wilaya ya Missenyi Mheshimiwa Projestus Tegamaisho amebainisha kwamba tumekuja kufanya mambo mbalimbali ikiwa ni pamoja na kupata uzoefu wa mradi wa soko la mazao la kimataifa  uliopo Wilaya ya Momba katika Kata ya Ndalambo Kijiji cha Kakozi lililopo mpakani mwa Tanzania na Zambia ambalo linashabihiana na na mradi wetu mkubwa wa soko la kimkakati la Kabakesa linalotarajiwa kujengwa katika Kata ya Mutukula katika mpaka wa Tanzania na Uganda.

"Tunahitaji kujua mbinu zilizotumika kujenga na kuendesha mradi huu pamoja na namna Halmashauri inavyopata mapato kupitia mradi huu" Alisema Mhe.Tegamaisho

Aidha, Mhe. Tegamaisho alibainisha maeneo mengine ya kujifunza katika Halmashauri ya Momba ikiwa ni pamoja na mbinu zinazotumiwa na Halmashauri katika kufanikisha Kilimo cha Mazao mbalimbali hususani kilimo cha  Mahindi kwa kiwango kikubwa ambacho ndio chanzo kikubwa  kinacho ongoza kwa kuingiza mapato katika Halmashauri hio, Kujifunza namna Halmashauri inavyofadika kupitia muingiliano wa wananchi wanaotoka Zambia katika kata zilizopo mpakani, Kupata uzoefu juu ya uendeshaji miradi ya kimkakati kupitia mfumo wa SPV na kupata uzoefu wa uanzishaji na uendeshaji wa Machinjio ya Kisasa iliounganishwa na Mnada wa Mifugo.

Kwa upande wake Kaimu Mkurugenzi Mtendaji wa Halmashauri ya Wilaya ya Missenyi Bw. Egidius Kahendaguza amesema kuwa wanatarajia kujifunza Miradi ya uwekezaji kupitia njia ya Ubia au bila ubia, utaratibu unaotumika katika kuwekeza, vyanzo vya mapato vya miradi ya uwekezaji, namna Halmashauri inavyo wavutia wawekezaji,  changamoto za miradi ya uwekezaji na ufumbuzi wake na kujifunza mamba Halmashauri inavyojishughulisha na  maswala ya Machinga.

Ziara ya siku ya kwanza imekamilika katika Halmashauri ya Momba na siku inayofuatia ziara itaendelea katika Halmashauri ya Mji wa Tunduma ambapo shughuli zinazofanyika katika mji huo kati ya Tanzania na Zambia zinafanana na shughuli zinafanyika katika Kata ya Mutukula katika mpaka wa Tanzania na Uganda.