ZIARA YA KWANZA YA RC CHALAMILA WILAYA YA MISSENYI

Posted on: August 13th, 2022

Mkuu wa Mkoa wa Kagera Albert Chalamila leo tarehe 13 Agosti 2022 amefanya ziara katika Wilaya ya Missenyi  katika eneo Bunazi na Mutukula.

Ziara hio ya siku moja, Mkuu wa mkoa ameweza kufika kwenye shule ya Msingi Bunazi Green Acres inapofanyika Semina kwa washiriki wa zoezi la Sensa ya Watu na makazi na kisha kuelekea Mutukula katika kituo cha  pamoja cha forodha (OSBP - MUTUKULA).

Akiwa Bunazi alipokea taarifa ya semina inatayotakiwa kuendeshwa kwa siku 19 iliyoanza tarehe 31 Julai 2022 na kutarajiwa kuhitimishwa 18 Agosti 2022 huku kukiwa na washiriki  409 ambao kati yao ni Makarani, Wasimamizi wa Maudhui na TEHAMA.

Aliwasihi washiriki kuhakikisha kwamba wanatimiza majukumu walioaminiwa na kupewa kwani walikua wengi sana na waliokosa nafasi hizo wanalalamika na itakua jambo la ajabu kwa aliepata kutotambua umuhimu wa nafasi aliyopewa ya kuhakikisha Taifa linapata takwimu sahihi kwa ajili ya mipango ya Taifa kwa ujumla.

Mheshimiwa Mkuu wa Mkoa akiwa katika kituo cha forodha cha pamoja (OSBP – MUTUKULA) kilichopo katika kata ya Mutukula aliwataka watendaji wa idara mbalimbali zilizopo mpakani hapo kuhakikisha wanakua na ushirikiano wa hali ya juu ili waweze kufikia malengo ya makusanyo yaliyokadiriwa kukusanywa katika mwaka wa fedha 2022/2023.

“Mhakikishe mnakua na vikao vya pamoja vya mara kwa mara ili kuweza kuondoa changamoto mbalimbali zinazoweza kuwa kikwazo baina ya nchi zote mbili” Alisema Chalamila.

Aidha aliwasisitiza watumishi wa kituo hicho kuhakikisha hawawi sehemu ya kikwazo kwa watumiaji wa mpaka huu ikiwemo kujiepusha na vitendo visivyoiridhisha kama vile rushwa, uingizwaji wa bidhaa zisizokidhi viwango pamoja na makadirio ya kodi yasiyokuwa na uhalisia hali inayoweza kuathiri mapato ya nchi.

Ikumbukwe kwamba hii ni ziara ya kwanza ya Mkuu wa Mkoa  katika Wilaya za Mkoa wa Kagera baada ya kuteuliwa na Rais wa Jamhuri ya Muungano wa Tanzania Mheshimiwa Samia Suluhu Hassan kuwa Mkuu wa Mkoa wa Kagera hivi karibuni.