WAZIRI MKUU: KITUO CHA AFYA KIFUNGULIWE NDANI YA SIKU TANO.

Posted on: September 23rd, 2023

Waziri Mkuu wa Jamhuri ya Muungano wa Tanzania, Mhe. Kassim Majaliwa leo tarehe 23 Septemba, 2023 amefanya ziara katika Wilaya ya Missenyi katika Kituo cha Afya Cha Kakunyu na kwenye Kituo cha Pamoja cha Forodha kilichopo mpakani mwa Tanzania na Uganda.

Akiwa katika kituo cha Afya cha Kakunyu kilichopo katika Kata ya Kakunyu wakati akizungumza na wanachi Mhe Waziri Mkuu amemuagiza Mkurugenzi wa Halmashauri ya Wilaya ya Missenyi kupeleka vitendea kazi na vifaa tiba ili kituo kianze  kutoa huduma ndani ya siku tano.

Mradi huu wa Kituo cha afya cha Kakunyu umegharimu shilingi milioni 613  ikiwa fedha za mapato ya ndani ni shilingi milioni 523 na Serikali kuu shilingi milioni 90 na mradi huu unatarajiwa kuhudumia wakazi wapatao elfu 26 kutoka maneo mbalimbali ya Wilaya ya Missenyi

 ''Halmashauri ya Wilaya ya Missenyi kila baada ya miezi mitatu inapokea shilingi milioni 135 kwa ajili ya kununua dawa, hivyo fedha zipo na niwatake kukamilisha taratibu za ununuzi wa madawa na vifaa tiba ili huduma ianze kutolewa'' Alisema Mhe Majaliwa.

"Nawapa siku 5, jengo hili la mapokezi na magonjwa ya kawaida lianze haraka iwezekanavyo na muanze kuleta Samani, vitendea kazi na mpaka sasa Madaktari tayari wapo hapa, fedha za madawa zipo hivyo wananchi waanze kupata huduma," ameeleza Mhe. Majaliwa

Ameendelea kueleza kuwa Serikali ya Awamu ya sita inayoongozwa na Rais Dkt. Samia Suluhu Hassan imetoa fedha nyingi kwa Wilaya ya Missenyi ndani ya miaka miwili ikiwemo Shule, Barabara, Zahanati na Vituo vya afya vimejengwa na Umeme unaendelea kusambazwa katika Vijiji vyote na miradi ya maji imetekelezwa kama ambavyo Rais wa Jamhuri ya Muungano wa Tanzania alidhamiria kumtua mama ndoo kichwani.

Amesisitiza juu ya utunzaji wa mazingira na vyanzo vya maji kwa kuwataka Serikali za Vijiji na kamati za mazingira kuahakikisha wanasimamia na kuchukua hatua kwa watu wanaoharibu mazingira na vyanzo vya maji ili Nchi iendelee kupata mvua na maji ya kutosha kwa matumizi ya majumbani, kilimo na mifugo.

Kwa upande wake Naibu Waziri wa Ofisi ya Rais Tamisemi Dkt. Festo Dugange amemshukuru Waziri Mkuu kwa kufika na kutembelea kituo cha afya cha Kakunyu huku akieleza kuwa kwa Wilaya ya Missenyi, Rais Dkt. Samia ametoa shilingi bilioni 4.8 kwa sekta ya afya na kati ya hizo zimetumika zimetumika kujenga Hospitali ya  kisasa ya Wilaya ya Missenyi.