Watoto 2,046 wapatiwa chanjo Missenyi

Posted on: April 24th, 2017

HALMASHAURI ya Wilaya ya Missenyi , imefanikiwa kutoa chanjo mbalimbali kwa watoto 2,046 walio chini ya mwaka mmoja kuanzia mwezi Januari  hadi Machi,mwaka huu. Idadi hiyo ya watoto ni sawa na asilimia  116 ya kutoa chanjo mbalimbali kwa watoto 1,890 walio chini ya mwaka mmoja.

Hayo yamesemwa na Ofisa Chanjo wa Halmashauri hii, Edward Kagari wakati wa mahojiano maalum Alisema kila mwaka watoto hupoteza maisha kutokana na magonjwa yanayozuilika kwa njia ya chanjo.

‘’Hivyo basi, watoto wakipatiwa chanjo kikamilifu na kukamilisha kwa wakati, hawawezi kupata magonjwa yanayozuilika kwa chanjo kama nilivyosema hapo awali ‘’alisema Kagari.

Alisema kuwapeleka watoto kupata chanjo mwananchi atakuwa ametoa mchango wao katika kuiwezesha Tanzania kufikia malengo ya millennia ambayo ni pamoja na kupunguza vifo vya watoto wenye umri chini ya miaka mitano.

Ili kufanikisha utoaji chanjo nawaombeni  wananchi  wote kuhakikisha tunawapeleka watoto kwenda kupata chanjo kwa mujibu wa ratiba katika vituo vya huduma za afya. Kutopeleka watoto kupata chanjo kwa wakati ni kukiuka sheria na kanuni za Afya(Public Health Act 2009)  inayohimiza watoto kupatiwa chanjo kwa wakati” alisema Kagari

 Aidha alitaja baadhi ya mikakati ya kufanikisha zoezi la utoaji chanjo, kuwa ni kuimarisha huduma za mkoba ambazo hutumika kusogeza huduma ya chanjo karibu na wananchi, kufanya ufuatiliaji kwa watoto walio nyuma ya ratiba ya chanjo na kuhakikisha wanakamilisha chanjo zao, kuwataka Viongozi na wadau mbalimbali    kuwahamasisha wazazi kuwapeleka watoto wao kupatiwa huduma ya chanjo.

Alitaja mikakati mingine kuwa ni kusambaza dawa za chanjo na vifaa kwa vituo vyote, kuendesha kampeni za kitaifa pamoja na kuelimisha jamii juu ya umuhimu wa chanjo kwa watoto chini ya mwaka mmoja.

Kwa mujibu wa Kagari, chanjo zinazotolewa na Halmashauri hii, ni dhidi ya Kifua kikuu, Homa ya Ini, kupooza,kifaduro, donda koo, surua , kichomi, pepo punda, mafua makali, uti wa mgongo na ugonjwa wa kuharisha.