WATENDAJI KATA NA VIJIJI WATAKIWA KUWA MSTARI WA MBELE KUTOA ELIMU YA LISHE KWA JAMII

Posted on: May 14th, 2025

Mkuu wa Wilaya ya Missenyi Mhe. Kanali (Mst) Hamis Maiga amewataka Watendaji wa Kata na Vijiji Wilayani Missenyi kuwa mstari wa mbele katika kutoa elimu ya lishe kwa jamii ili kuondokana na tatizo la udumavu.

Hayo ameyasema leo Mei 14, 2025 katika Kikao cha kutathmini utekelezaji wa Mkataba wa Lishe ngazi ya Kata na Vijiji kwa robo ya tatu ya Januari mpaka Machi 2025.

"Kama tutaendelea kuzalisha vijana ambao ni wadumavu kwa kifupi hatujaitendea haki Missenyi na Tanzania, Hivyo ni waombe kila mtu kwa nafasi yake aweze kutoa elimu kwa jamii juu ya namna bora ya kupambana na udumavu na kuzingatia lishe bora", amesema Mhe. Maiga.

Aidha, ametaka uwepo wa mawasiliano na ushirikiano wa karibu baina ya Afisa lishe waWilaya, Maafisa Tarafa, Watendaji wa Kata na Vijiji ili taarifa nyingi zinazohusu masuala ya lishe kwa jamii ziweze kushughulikiwa ikiwa ni pamoja na namna ya kufikisha elimu kwa jamii juu ya lishe na kukumbushana utekelezaji wa majukumu yao.

Akiwasilisha taarifa ya utekelezaji wa mkataba wa Lishe ngazi ya Kata na Vijiji kwa kipindi cha Januari hadi Machi 2025, Afisa lishe Wilaya ya Missenyi Bi. Faustina Godwin amesema kwamba katika robo ya tatu watoto 4 waligundulika kuwa na utapiamlo mkali Wilayani Missenyi na kupatiwa matibabu.

"Watoto hao waliogundulika na utapiamlo mkali walipatiwa matibabu katika Kituo cha Afya Bunazi, Hospitali ya Mugana na Kagera Sugar na wote walipona", amesema Bi. Faustina.

Ameongezea kuwa usimamizi shirikishi umefanyika katika Vituo vya kutolea huduma za Afya vya Ruzinga, Buyango, Kitobo, Bugorora, Buchurago, Bulembo, Nyankere, Mwemage, Kilimilile, Igayaza, Ngando, Bunazi HC, Kabyaile na St. Theresia.

Amebainisha kwamba katika vituo vya kutolea huduma za kliniki, utoaji wa dawa za Madini chuma unaendelea kwa wajawazito na jumla ya Wanawake 11,411 waliohudhuria Kliniki wamepatiwa dawa kinga dhidi ya upungufu wa damu na vilema kwa Watoto.

Pia elimu juu ya ulishaji wa Watoto wadogo na wachanga inaendelea kutolewa katika huduma ya mama na mtoto na Mkoba ambapo Wanawake 25,446 walifikiwa kwa kipindi hicho.

Kwa upande wake, Kaimu Afisa Lishe Mkoa wa Kagera Bi. Winifrida Lyoba amewataka Watendaji wa Kata na Vijiji kuitumia  elimu hii wanayopata kuisaidia jamii juu ya masuala ya lishe.

"Watendaji wa Kata na Vijiji tumieni nafasi hii kufikisha taarifa hizi kwenye jamii, ili kuweza kuikomboa dhidi ya udumavu", amesema Bi. Winifrida.

Ameongezea kuwa watu wengi wanasumbuliwa na udumavu na ni vyema kukubali hilo ili kuweza kupambania Watoto wetu na kuchukua hatua.

Kikao hicho cha tathmini ya utekelezaji wa mkataba wa lishe ngazi ya Kata na Vijiji kwa robo ya tatu kimefanyika katika Ukumbi wa William F. Katunzi uliopo Makao makuu ya Halmashauri ya Wilaya ya Missenyi na kuhudhuriwa na Wajumbe kutoka Ofisi ya Mkuu wa Wilaya, Wakuu wa Idara zinazohusika na lishe, Afisa Lishe Mkoa, Watendaji wa Kata na Vijiji, Maafisa Tarafa, Wajumbe Timu ya Menejimenti ya  Afya ya Wilaya (CHMT) na Watoa huduma za Afya.