WANACHI KUWENI WAZALENDO KWENYE ZOEZI LA SENSA YA WATU NA MAKAZI

Posted on: August 13th, 2022

WANACHI KUWENI WAZALENDO KWENYE ZOEZI LA SENSA YA WATU NA MAKAZI

Mkuu wa Wilaya Missenyi Kanali Wilson Sakulo amewaasa wanachi kuwa wazalendo kwa Taifa lao kwani hakuna malipo yatakayotolewa kwa wananchi wakati wa kuhesabu watu katika zoezi la Sensa ya Watu na Makazi itakayofanyika tarehe 23 Agosti 2022.

Kanali Sakulo ametoa kauli hiyo akiwa Ofisini kwake leo Jumamosi tarehe 13 Agosti 2022 wakati akiongea na vyombo vya habari juu ya masuala mbalimbali yanayohusu Sensa ya Watu na Makazi pamoja na mchakato wa mafunzo yanayoendelea kwa watu 409 ambao kati yao ni Makarani, Wasimamizi wa Maudhi na TEHAMA.

"Jana tarehe 12 Agosti 2022 wasimamizi wa Sensa wanaoendelea na mafunzo walipita katika baadhi ya kaya katika kata ya KASSAMBYA kufanya majaribio ya kutumia vifaa na kuuliza maswali lakini cha kusikitisha baadhi ya wananchi walitaka kujua kama watalipwa ili watoe taarifa zao" Amesema Sakulo

Aidha Kanali Sakulo amesisitiza kwamba hakuna Mwananchi atakayelipwa fedha ili kutoa taarifa zake kwakuwa zoezi la Sensa ni suala muhimu kwa maendeleo ya Taifa hivyo wananchi wanatakiwa kuwa wazalendo na kutoa ushirikiano kwa kutoa taarifa sahihi kutokana na Maswali watakayoulizwa.

Ameongeza kuwa Sensa ya Watu na Makazi inalenga kuiwezesha serikali na wadau wengine kupata takwimu sahihi za Watu na Makazi ili kuwezsha mipango ya Maendeleo.

Ikumbukwe kwamba Sensa ya Watu na Makazi kwa mara ya mwisho ilifanyika mwaka 2012 huku Wilaya ya Missenyi ikiwa na watu wapatao laki mbili ingawa kutokana na makadirio ya ongezeko la watu la 1.1% kwa mwaka, Wilaya ya Missenyi inatarajiwa kuwa na watu zaidi ya 276,000.