WALIOKOSA MIKOPO KWA AWAMU YA KWANZA WAPEWE ELIMU

Posted on: April 30th, 2025

Leo terehe 30 Aprili, 2025 Baraza la Madiwani katika Halmashauri ya Wilaya ya Missenyi limeelekeza kufanyika zoezi la utaoji elimu kwa wale wote waliokosa Mkopo unaotolewa na Halmashauri kwa Wanawake, Vijana na Watu wenye Ulemavu.

Hayo yamesemwa katika mkutano  wa kawaida wa Baraza la Madiwani wa robo ya tatu 2024/25 uliofanyika mapema leo katika ukumbi wa Wiliam F. Katunzi uliopo makao makuu ya Halmashauri.

Katika mkutano huo, Mwenyekiti wa Halmashauri ya Wilaya ya Missenyi Mhe. Projestus Tegamaisho amesema kwamba waliokosa hawajafahamu sababu za kukosa mkopo uliotolewa awamu ya kwanza hivyo kabla ya kuanza zoezi kwa awamu ya pili elimu itangulie ili waweze kujua walikosea wapi na kufanya masahihisho ili kufanikiwa katika awamu ijayo.

"Vikundi vingi wana maandiko ya mradi lakini hawajui kilichopo kwenye andiko na pale wakaguzi wanapowatembelea wakiulizwa maswali wanashindwa kutoa majibu sahihi kutokana na wengi wao kuandaliwa maandiko na watu wengine kwa gharama kubwa  na  bila kuwafafanulia yaliyomo ndani ya andiko la mradi". Amesema Mhe. Tegamaisho.

Katika utoaji wa Mikopo itolewayo na Halmashauri  kutoka mapato ya ndani kwa Wanawake, Vijana na Watu wenye Ulemavu kwa awamu ya kwanza Halmashauri ya Wilaya ya Missenyi ilitenga shilingi bilioni moja na ilipokea maombi ya vikundi 460 yenye thamani ya shilingi bilioni 9.7 na vikundi vilivyokaguliwa kwa awamu ya kwanza ni 158, vilivyotimiza vigezo vya kupata mkopo ni vikundi 98  ambapo vimepatiwa mkopo wenye thamani ya shilingi milioni 764.5.

Akiwasilisha taarifa mbele ya Baraza Mkuu wa Divisheni ya Maendeleo ya Jamii Bi. Beatrice Sanga amesema Vikundi 13 vilipata changamoto ya kupokea fedha kutokana na BOT kushindwa kuingiza fedha kutokana na baadhi ya akaunti kutohuishwa na kutofautiana kwa majina ya vikundi kwenye mfumo wa usajili na majina ya akaunti zao za benki.

"Mpaka sasa tumefanya ufuatiliaji na vikundi 10 kati ya 13 havijapokea mkopo na tuandelea kufanya ufuatiliaji hivyo wawe na subira". Amesema Bi. Sanga

Ameongezea kwamba vikundi vitakavyo kaguliwa kwa awamu ya pili ni 286 na tayari Mkurugenzi Mtendaji ameshatangaza uwepo wa shilingi bilioni 1.6 kwa dirisha la pili kwa vikundi vitakavyokidhi vigezo.

Kwa upande wa madeni ya mikopo iliotolewa kipindi cha nyuma, Mkurugenzi Mtendaji wa Halmashauri ya Wilaya ya Missenyi amepokea maelekezo ya Baraza juu ya kukusanya deni la shilingi milioni 289.5 kutoka vikundi 63 ili ziweze kukopeshwa kwa watu wengine.

Baraza hilo la siku mbili lilipokea na kujadili taarifa za utekelezaji za kata  zote 20 za Halmashauri ya Wilaya ya Missenyi kwa siku ya kwanza na siku ya pili limepokea na kujadili taarifa za utekelezaji za kamati za kudumu za Halmashauri.