WAJAWAZITO WATAKIWA KUTUMIA KWA WAKATI DAWA ZA KUONGEZA DAMU

Posted on: September 4th, 2025

Mkuu wa Wilaya ya Missenyi Mhe. Kanali Mstaafu Hamis Maiga leo 04 Septemba ,2025 ameongoza kikao cha tathmini ya mkataba wa lishe kwa robo ya nne kilicho wakutanisha wajumbe wa kamati ya afya ngazi ya Wilaya , wakuu wa Divisheni na Vitengo, Maafisa lishe na Watendaji wa Kata katika Halmashauri ya Wilaya ya Missenyi

Amesisitiza utoaji wa uji kwa wanafunzi wote wa shule za msingi na sekondari,  Pamoja na kuzingatia utoaji wa chakula kwa shule za sekondari  na madarasa ya mtihani kwa shule za msingi kutokana na kuwa na masomo ya ziada ili kuinua kiwango cha ufaulu katika Wilaya ya Missenyi.

Aidha, amesisitiza matumizi ya dawa kwa wakati sahihi zinazotolewa kwa wajawazito kwa ajili ya kuongeza damu sambamba na kuzingatia ushauri wa wataalamu wa afya ili kuepuka madhara  kwa mtoto na mama wakati wa kujifungua.

Kwa upande wake Mganga mkuu wa Halmaashauri ya Wilaya ya Missenyi Dkt. Daniel Chochole amewataka wajawazito kuhakikisha wanatumia dawa hizo kwani licha ya kuongeza damu pia husaidia katika kuimarisha uumbaji wa mtoto katika mfumo wa fahamu.

 “Wito wangu kwa akina mama wahakikishe wanafika Kliniki na wenza wao hususan katika kipindi cha Miezi mitatu ya mwanzo kwani wataalamu wanapata wakati mzuri wa kugundua madhara kabla ya kumuathiri mama au mtoto kabla ya kupata madhara” Alisema Dkt. Chochole

 Afisa lishe wa Halmashauri ya Wilaya ya Missenyi Bi. Faustina Godwin amesema kuhudhuria kliniki ni muhimu kwa wajawazito lakini hata wale wenye matarajio ya kubeba ujauzito ili waweze kupata ushauri wa wataalam juu ya namna bora ya kujiandaa ili kuweza kubeba ujauzito na kupata mtoto mwenye afya njema.

 Akitoa Tathmini ya Mkataba wa lishe amewataka wananchi kuhakikisha wanatumia vyakula vilivyo ongezewa  virutubisho ikiwa ni Pamoja na urutubishaji wa mazao kama viazi lishe, mahindi lishe, maharage lishe ili kuboresha chakula cha Watoto kwa kuzingatia kanuni za afya.

Kikao hicho kimefanyika katika ukimbi mdogo wa mikutano uliopo katika ofisi za mkurugenzi mtendaji wa Halmashauri ya Wilaya ya Missenyi.