WAHUDUMU VITUO VYA AFYA MISSENYI WAPATIWA MAFUNZO UTOAJI WA HUDUMA ZA LISHE

Posted on: November 22nd, 2024

Halmashauri ya Wilaya ya Missenyi kupitia ofisi ya Mganga Mkuu leo Novemba 22, 2024 imetoa mafunzo rejea ya utoaji wa huduma za lishe kwa Wahudumu wa Vituo vya Afya kwa lengo la kukumbushana wajibu katika utekelezaji wa utoaji wa huduma hizo kwa wanawake wajawazito na watoto.

Mafunzo hayo yameenda sambamba na zoezi la ugawaji wa vitendea kazi ambavyo ni Mbao za kupimia Urefu(Length board) katika Vituo 10 vya Afya pamoja na Utepe (MUAC Tape).

Akizungumza katika mafunzo hayo, Afisa Lishe Halmashauri ya Wilaya ya Missenyi Bi. Faustina Godwin amewataka Wahudumu wa Vituo vya Afya waliopatiwa mafunzo hayo kutoa huduma kwa weredi na ubora ili kutokomeza wimbi la udumavu katika Wilaya ya Missenyi.

Aidha, wakati akifunga mafunzo hayo Kaimu Mkurugenzi Mtendaji Halmashauri ya Wilaya ya Missenyi Bi. Tapita Tuvana amewataka Wahudumu wa Vituo vya Afya kuwafundisha na kuwaonesha wazazi kwamba suala la utapiamlo na udumavu linalotokana na ukosefu wa lishe bora linarekebishika na hivyo wathibitishe utendaji wao kwa kuonesha matokeo.

Mafunzo hayo yaliyofanyika katika Ofisi za Halmashauri ya Wilaya ya Missenyi yamehudhuriwa na Kaimu Mkurugenzi Mtendaji Halmashauri ya Wilaya ya Missenyi Bi. Tapita Tuvana, Muuguzi Mkuu Halmashauri ya Wilaya ya Missenyi Bi. Lucia Eustace, Mratibu Huduma za Mama na Mtoto Wilaya ya Missenyi Bi. Adelaida Kemilembe, Afisa Lishe Bi. Faustina Godwin, Mratibu wa Matibabu Halmashauri ya Wilaya ya Missenyi Dr. Jamily Bishazo na Wahudumu Kutoka Vituo vya Afya ndani ya Halmashauri ya Wilaya ya Missenyi.