MIKOPO: MILIONI 526.7 ZATOLEWA KWA VIKUNDI VYA VIJANA, WANAWAKE NA WATU WENYE ULEMAVU

Posted on: February 10th, 2023

Leo tarehe 10 Februari 2023 Baraza la madiwani Halmashauri ya Wilaya ya Missenyi limeidhinisha mikopo itokanayo na asilimia 10 ya mapato ya ndani yenye thamani ya shilingi milioni 526.7 kwa vikundi vya vijana 22, wanawake 42 na 04 vya watu wenye ulemavu.

Akizungumza wakati wa utoaji wa mikopo hio mwenyekiti wa halmashauri ya Wilaya ya Missenyi Bw. Projestus Tegamaisho alisema kwamba mpaka sasa kajawa na vikundi vyenye uwezo mkubwa wa kuchukua angalau milioni 50 na wakafanya ujasiriamali na vikundi vya namba hii tunavihitaji laki bado havijapatikana wakati halmashauri ina uwezo wa kutoa fedha hizo.

"Kila wakifanya ukaguzi wanasema hali walioikuta inafanana na kiasi cha fedha mlizopewa sasa tunataka vikundi vinavyoweza kuchukua fedha nyingi" Alisema Bw. Tegamaisho

Aidha alisisriza kwamba baraza la Madiwani wamekubalia kwamba hii itakua mara ya mwisho kugawa pikipiki kwani vijana walio wengi wanaishia barabarani hali inayosababisha kupoteza vijana wengi kwenye ajali na wengine kukimbilia huko kwakuona ndio shughuli nyepesi ya kufanya.

"Tumejipanga kama baraza la madiwani kuhakikisha wilaya yetu inaingia katika kilimo cha Parachichi aina ya HASS na Mibuni ili tuweze kuingiza kipato cha kutosha kwa kuhakikisha tunagawa miche kila kaya bure na wataalamu wa kutoa elimu" alisema Bw. Tegamaisho.

Kwa upande wake Mkurugenzi Mtendaji wa Halmashauri ya Wilaya ya Missenyi Bw. Waziri Khachi Kombo alisema tutaendelea kukusanya mapato kwa hali na mali ili kuhakikisha fedha za mikopo zinapatikana kwa wingi zaidi ya hii iliyotolewa.

"Nitoe rai kwa wenye sifa za kukopa wachangamkie fursa hii haswa kwa kuweka vitega uchumi vinavyoeleweka na vitakavyorudisha fedha waliyopewa na serikali". Alisema Bw. Kombo.

Akitoa taarifa ķatika baraza la madiwani Mkuu wa Divisheni ya Maendeleo ya Jamii Halmashauri ya Wilaya ya Missenyi Bi. Beatrice Sanga alisema idadi ya vikundi vilivyo omba mkopo katika robo hii ya pili ya mwaka wa fedha 2022/23 vilikua vikundi 86 ambapo vikundi na vilivyokidhi vigezo ni 68 na vikundi 18 vilipoteza sifa.

"Sababu za kukosa sifa ni pamoja na Baadhi ya wanachama kuzidi umri haswa kwa vijana ambao wanapaswa kuwa na umri kuanzia miaka 18 hadi 35, baadhi ya vikundi kuwa na wanachama pungufu ya watano na baadhi yao kutofautiana sana wakayi wa mahojiano hali inayotupelekea kugundua kwamba mradi sio wa kikundi bali ni wa mtu mmoja au wawli” Alimema Bi. Sanga.

Ikumbukwe kwamba mikopo hii inayotolewa kutokana na asilimia kumi ya mapato ya ndani ya halmashauri haina riba wala gharama ya namna yeyote na kiasi utakachopokea ndicho unachopaswa kurudisha na si vinginevyo.

.