WAZEE WATAKIWA KUWA CHACHU YA KUDUMISHA AMANI NA KUHIMIZA MALEZI BORA KWA VIJANA

Posted on: October 1st, 2025

Mkuu wa Wilaya ya Missenyi Mhe. Kanali (Mst) Hamis Maiga amewataka Wazee Wilayani humo kuwa chachu ya kudumisha amani na kuhimiza malezi bora kwa Vijana.

Hayo ameyasema leo Oktoba 01, 2025 katika Maadhimisho ya siku ya Wazee Duniani ambapo Kiwilaya maadhimisho hayo yamefanyika katika Uwanja wa Shule ya Sekondari Minziro iliyopo Kata ya Minziro.

"Kama mnavyofahamu, amani na usalama ni msingi wa maendeleo, bila ya amani hakuna maendeleo; na zaidi, pasipo na amani, wenye kuathirika zaidi ni pamoja na Wazee. Hivyo ni waombe muwe mabalozi wazuri wakudumisha amani", amesema Mhe. Maiga.

Ameongezea kuwa Wazee hawana budi kuhimiza malezi bora kwa Vijana ili kuendelea kujenga Taifa lenye uadilifu.

"Mimi naamini, Vijana wetu wakilelewa vizuri tutajenge Taifa la watu waadilifu, waaminifu na wazalendo kwa nchi yao, wasiojihusisha na vitendo viovu vya wizi, rushwa, matumizi ya dawa za kulevya na vitendo vingine ambavyo ni kinyume cha maadili na tamaduni zetu. Hivyo Wazee hamna budi kuendelea kuhimiza malezi bora kwa Vijana wetu", ameongezea Mhe. Maiga.

Awali akisoma risala ya Wazee wa Wilaya ya Missenyi, Mwenyekiti wa Baraza la Wazee la Wilaya ya Missenyi, Mzee Lenatus Leo, amesema kuwa, wao kama Wazee wanaomba kutimiziwa baadhi ya mambo ili kuweza kukidhi matibabu ya wazee na kujikwamua kiuchumi.

"Sisi Wazee wa Wilaya ya Missenyi kwa pamoja tunaomba, Vitambulisho vya Wazee vipandishwe hadhi ili kuweza kukidhi matibabu kwa Wazee, zoezi la vitambulisho kwa Wazee liwe endelevu, tupewe mikopo kwa riba nafuu, na tupate wawakilishi ngazi ya Bunge la Jamhuri ya Muungano wa Tanzania Kila Wilaya", amewasilisha Mzee Lenatus.

Aidha, amesisitiza kwamba Wazee ni miongoni mwa makundi maalumu amabayo yanahitaji kutazamwa kwa jicho la pekee kama makundi mengine.

Maadhimisho haya ya Siku ya Wazee Duniani hufanyika Oktoba 01 kila mwaka, ambapo kwa Tanzania kwa mwaka huu maadhimisho haya yameambatana na kauli mbiu isemayo; " Wazee tushiriki Uchaguzi kwa Ustawi wa Jamii yetu".