Wananchi wahimizwa kujiunga CHF

Posted on: April 20th, 2017

WANANCHI Wilaya ya Missenyi, mkoani Kagera, wameshauriwa kujiunga na Mfuko wa Afya ya Jamii (CHF), ili waweze kutibiwa kirahisi pale wanapopatwa na maradhi mbalimbali.

Ushauri huo ulitolewa leo na Mkuu wa Wilaya ya Missenyi, Luteni Kanali Denis Mwila wakati akizungumza na wananchi wa Wilaya hapa.

Alisema mfuko huo ni msaada na mkombozi wa kweli wa afya za jamii, lakini wananchi wengi bado hawajaelewa faida na manufaa yake.

“Nimetaarifiwa wananchi wanaoufaidika na huduma za mfuko huu hadi Machi 31, mwaka huu hapa Missenyi ilikuwa ni kaya CHF ni 7,896 sawa na asilimia 16.1 ya kaya 48,942 zinazotakiwa kujiunga. Hivyo jitihada za makusudi lazima zifanyike sasa ili kuibadilisha Missenyi,” alisema.

Mratibu wa Mfuko wa Taifa wa Bima ya Afya ya Jamii wilayani Missenyi, Anold Nkongoki, alisema huduma za bima ya afya jamii zinatolewa katika vituo 25 vinavyomilikiwa na Serikali vilivyomo Wilayani hapa

Aidha changamoto kubwa zinazokabili maendeleo ya mfuko huu ni pamoja na “Uelewa mdogo wa baadhi ya wadau wa uhamasishaji juu ya CHF mfano; viongozi wa vijiji na vitongoji, kasi ndogo ya kaya kujiunga, upungufu wa dawa na vifaa tiba vituoni pamoja na baadhi ya wadau kutotimiza wajibu wao wa uhamasishaji jamii kujiunga na mfuko” alisema Nkongoki

Hata hivyo mikakati mbalimbali imewekwa kwa ajili ya kukabiliana na changamoto hizo kama “kuimarisha mbinu za uhamasishaji, kuweka mipango madhubuti ya upatikanaji wa dawa na vifaa tiba pamoja na kufanya suala la mfuko wa jamii kuwa ajenda ya kudumu katika vikao vyote vya kisheria” alisema Nkongoki.