TFS MISSENYI YAKABIDHI MADAWATI 90 KWA SHULE ZA SEKONDARI BUNAZI NA MUTUKULA

Posted on: March 7th, 2025

Leo tarehe 07/03/2025 Wakala wa Huduma za Misitu Tanzania (TFS) wamekabidhi madawati 90 kwa Shule za Sekondari Bunazi na Mutukula.

Akizungumza katika makabidhiano hayo yaliyofanyika katika Chuo cha Maendeleo ya Wananchi kilichopo Kata ya Gera Kamishina Msaidizi Mwandamizi wa Uhifadhi ambaye pia ni Kamanda wa TFS Kanda ya Ziwa Ebrantino E. Mgiye amesema TFS itaendelea kushirikiana na taasisi za serikali kuhakikisha wanendelea kuboresha miundombinu ya kujifunzia.

"TFS tutaendelea kushirikiana na taasisi za serikali ikiwepo shule kuhakikisha kwamba tutaendelea kuboresha miundombinu ya kujifunzia, tunafahamu kwamba kadri mazingira sahihi ya kujifunza yanavyopatikana na wanafunzi wanapata elimu ambayo ni sahihi kabisa". Amesema Ebrantino Mgiye.

Kwa upande wake Mhifadhi Misitu Wilaya ya Missenyi kutoka TFS Bw. Mrisho Juma akisoma taaarifa fupi wakati wa makabidhiano hayo amesema kwamba Wakala wa Huduma za Misitu Tanzania (TFS) kwa kutekeleza majukumu yake imekuwa ikitoa michango inayoigusa jamii katika sekta mbalimbali ikiwa ni pamoja na sekta ya elimu.

Aidha amesema kwamba TFS Wilaya ya Missenyi kwa mwaka wa fedha 2024/25 iliweka lengo la kutoa madawati 90 kwa shule za Sekondari za Bunazi na Mutukula ambapo leo hii madawati hayo yamekabidhiwa na mradi huo wa madawati 90 pamoja na viti 90 umegharimu Shilingi Milioni 5.9 ikiwa ni fedha ya vyanzo vya ndani vya taasisi.

Akipokea madawati hayo Mkuu wa Wilaya ya Missenyi Mhe. Kanali (Mst) Hamis Maiga amewashukuru TFS kwa kuendelea kuigusa jamii ya Wana Missenyi hususani katika sekta ya elimu kwa kuchangia Madawati 90 kwa Shule za Sekondari Bunazi na Mutukula.

"Siku zote TFS Wilaya ya Missenyi wamekuwa wakitengeneza kila mwaka madawati 45 mpaka 50, lakini tuliona ile idadi ni ndogo tukaweka kilio chetu na kilio kimesikilizwa na leo tumetoka 45 tuko 90, kwahiyo muendelee na moyo huo huo wa kujitoa". Amesema Mhe. Hamis Maiga.

Aidha amewataka Walimu wa shule zilizopewa madawati hayo kuhakikisha zinayatunza vizuri kwani amekuwa akipita kwenye baadhi ya shule na kukuta utunzaji wa madawati si mzuri.

Kwa upande wake Kaimu Afisa Elimu Sekondari Wilaya ya Missenyi ambae pia amemuwakilusha Mkurugenzi Mtendaji Halmashauri ya Wilaya ya Missenyi Bw. Dancras Ishengoma ameishukuru TFS kwa kuona umuhimu wa kutoa madawati hayo kwa wanafunzi kwani yataenda kupunguza idadi ya upungufu wa madawati kwa Shule za Sekondari Bunazi na Mutukula.

Pia ameongezea Kuwa watafuata na kutekeleza maelekezo waliyopewa na Mkuu wa Wilaya ya Missenyi Mhe. Kanali (Mst) Hamis Maiga juu utunzaji wa madawati hayo.

Madawati haya 90 yamegawanywa kwa Shule mbili za Sekondari Bunazi na Mutukula ambapo kila shule imepokea seti 45 za madawati yaani kiti na meza yake.

Wakala wa Huduma za Misitu Tanzania (TFS) wamekuwa wakiigusa jamii katika nyanja mbalimbali na makabidhiano haya ya madawati 90 yatasaidia kupunguza changamoto ya upungufu wa madawati katika Shule za Sekondari Bunazi na Mutukula, hivyo kuboresha mazingira ya kufundisha shuleni.