NGO's ZAASWA KUTOKUKUBALIANA NA MASHARTI MAGUMU YA WAFADHILI

Posted on: June 26th, 2025

Mkuu wa Wilaya ya Missenyi Mhe. Kanali (Mst) Hamis Maiga ametoa wito kwa Viongozi wa Mashirika yasiyo ya Kiserikali kutokukubaliana na sera na masharti magumu ya Wafadhili yanayoweza kuwaingiza katika mgogoro wa Kisheria na kuhatarisha uhai wa Mashirika yao.

Mhe. Hamis Maiga ametoa wito huo leo Juni 26, 2025 katika Kongamano la Mashirika yasiyo ya Kiserikali Wilayani Missenyi lenye lengo la kuelimishana juu ya masuala ya uendeshaji wa Mashirika hayo, ikiwa ni pamoja na kubaini changamoto na kuweka mikakati ya pamoja ya utatuzi na kuwa na mpango endelevu wa kuimarisha utendaji wa Mashirika hayo.

Amesema kwamba Serikali haitosita kuchukua hatua kali endapo kuna Shirika lolote litakalotumia vibaya usajili wake kwa kujihusisha na vitendo viovu.

"Serikali ya Wilaya haitasita kuchukua hatua kali za kisheria kwa Shirika lolote litakalotumia vibaya usajili wake kujihusisha na vitendo viovu vinavyokinzana na sheria, mila na desturi za nchi yetu", amesema Mhe. Maiga.

Aidha, ameongezea kuwa Serikali ya Wilaya ipo tayari kutoa ushirikiano ili kuimarisha mahusiano na Mashirika yasiyo ya Kiserikali na wadau wa maendeleo kwa ajili ya kuiwezesha Wilaya ya Missenyi kusonga mbele.

Awali akizungumza katika ufunguzi wa Kongamano hilo kwa niaba ya Mkurugenzi Mtendaji wa Halmashauri ya Wilaya ya Missenyi, Mkuu wa Divisheni ya Kilimo, Uvuvi na Mifugo Bi. Tapita Tuvana ameyashukuru Mashirika yasiyo ya Kiserikali kwa kuendelea kuunga mkono juhudi za Serikali.

"Napenda kutumia jukwaa hili kuzishukuru NGO's mnazowakilisha kwa namna zinavyoendelea kuunga mkono juhudi za Serikali katika kutatua changamoto za wananchi na kunufaisha makundi mbalimbali kupitia utekelezaji wa miradi ya maendeleo katika sekta na nyanja mbalimbali", amesema Bi. Tapita.

Ameongezea kuwa mchango wa Mashirika yasiyo ya Kiserikali katika Halmashauri ya Wilaya ya Missenyi ni Shilingi bilioni 5.1 Katika kipindi cha 2020/2021 hadi 2024/2025 ambapo fedha hizo zimetumika katika jamii kupitia mifumo ya utendaji wa Mashirika hayo kulingana na taratibu na mashariti ya ufadhili.

Hata hivyo, kupitia miradi hiyo fursa za ajira kwa vijana zimepatikana, uchumi wa jamii umeongezeka, uelewa na ari ya wananchi kujitolea imeongezeka pamoja na uhatarishi kwa makundi maalumu umepungua.

Kongamano hilo limefanyika katika Ukumbi mdogo wa Halmashauri ya Wilaya ya Missenyi na Mgeni rasmi akiwa Mkuu wa Wilaya ya Missenyi na kuhudhuriwa na Viongozi wa Mashirika yasiyo ya Kiserikali yaliyopo Wilayani Missenyi na baadhi ya Watendaji wa Halmashauri ya Wilaya ya Missenyi.