MISSENYI YATIA SAINI MKATABA WA UJENZI SOKO LA KISASA BUNAZI

Posted on: June 20th, 2025

Leo Juni 20, 2025, Halmashauri ya Wilaya ya Missenyi imetia saini mkataba wa ujenzi wa soko la kisasa la Bunazi lilipo Kata ya Kassambya Wilayani Missenyi wenye thamani ya Shilingi bilioni 5.7.

Zoezi hilo limefanyika katika viwanja vya  soko la Bunazi likimhusisha Mkandarasi atakayetekeleza ujenzi wa mradi huo, Mniko Construction kutoka Musoma na Halmashauri ya Missenyi.

Akizungumza katika hafla hiyo ya utiaji saini Mkuu wa Wilaya ya Missenyi Mhe. Kanali (Mst) Hamis Maiga amemtaka Mkandarasi kuhakikisha anatekeleza mradi kwa ubora.

"Ujenzi huu utakapokamilika utatoa fursa kwa wananchi kupata maeneo ya kufanyia biashara na  mkandarasi ahakikishe anatekeleza mradi kwa ubora, viwango na ndani ya muda  aliopewa", amesema Mhe. Maiga.

Aidha, amewataka wananchi wa Bunazi kuhakikisha wanakua walinzi wa mradi lakini pia, watumishi wahakikishe wanazingatia taratibu zote za ujenzi ikiwa ni pamoja na kuhakikisha thamani ya fedha inaonekana.

Awali akifungua hafla hiyo Mkurugenzi Mtendaji wa Halmashauri ya Wilaya ya Missenyi Bw. John Paul Wanga amebainisha kuwa thamani ya mradi huo mpaka kukamilika kwake utagharimu shilingi bilioni 17.5 na utajengwa kwa awamu mbalimbali, ambapo kwa awamu ya kwanza zitatumika Shilingi bilioni 5.7.

Aidha, amewaomba wananchi wote kuonyesha ushirikiano ili mradi huo uweze kukamilika na kufikia malengo ya mradi yaliyokusudiwa katika mradi huo.

Kwa upande wake Mwenyekiti wa Halmashauri ya Wilaya ya Missenyi Mhe. Projestus Tegamaisho amewataka wananchi wa maeneo hayo kuhakikisha wanachangamkia fursa pindi ujenzi utakapokamilika ili kuongeza kipato cha mwananchi mmoja mmoja na Halmashauri kwa ujumla.

Aidha, amebainisha malengo ambayo Halmashauri ya Wilaya ya Missenyi imejiwekea ikiwa ni pamoja na kuwa Manispaa kwa siku za usoni.

"Miradi yetu mikubwa itakapomamilika tunahitaji kuifanya Missenyi iwe Manispaa, maana wakati tunaingia, Halmashauri ilikua inakusanya  milioni 600 lakini kwa sasa tunaelekea kufikia bilioni 12 na tunaendelea kukusanya zaidi", amesema Mhe. Tegamaisho.

Kwa upande Mheshimiwa Mbunge wa Jimbo la Missenyi Mhe. Florent Kyombo amempongeza Mwenyekiti wa Halmashauri ya Wilaya ya Missenyi kwa kusimamia vyema Halmashauri mpaka kufanikisha utekelezaji wa miradi mikubwa.

"Nimpongeze Mwenyekiti wa Halmashauri kwa kusimamia vyema Halmashauri mpaka kutekeleza mradi mkubwa kama huu na niwaombe wakati sisi Madiwani tunamaliza muda wetu leo, Wataalam pamoja na Chama msimamie vyema ili tukirudi tukute mmefikia katika hatua nzuri",amesema Mhe. Kyombo.

Mradi wa ujenzi wa soko la kisasa la Bunazi unatarajiwa kutekelezwa kwa muda wa miezi 18 kuanzia Juni 20, 2025 ambayo ni siku ya kusainiwa kwa mkataba.

Shughuli hio ya utiaji saini imehudhuriwa na  viongozi mbalimbali wa Serikali,Taasisi za Serikali na binafsi, Viongozi wa dini, Chama  na wananchi.