MISSENYI YAPATA HATI SAFI MIAKA 10 MFULULIZO

Posted on: June 17th, 2025

Mkuu wa Mkoa wa Kagera Mhe. Hajjat  Fatma Mwasa ameipongeza Halmashauri ya Wilaya ya Missenyi kwa kupata hati safi kwa kipindi cha miaka 10 mfululizo.

Akizungumza katika Baraza maalum la Madiwani la Kujadili taarifa ya Mdhibiti na Mkaguzi Mkuu wa Hesabu za Serikali (CAG) lililofanyika katika Ukumbi wa William F. Katunzi uliopo Makao makuu ya Halmashauri ya Wilaya ya Missenyi leo Juni 17, 2025, Mhe. Hajjat Fatma Mwasa amesema ana kila sababu ya kuipongeza Missenyi kwa kupata hati safi miaka 10 mfululizo.

"Nina kila sababu ya kuwapongeza kwa kupata hati safi kwa miaka 10 mfululizo, lakini sio tu kupata hati safi, mmepata hati safi kwa miaka 10 mfululizo mkiwa na hoja chache na zinazoelezeka, hii nayo imeleta faraja kubwa", amesema Mhe. Mwasa.

Aidha, amempongeza Mkuu wa Wilaya ya Missenyi, Mwenyekiti wa Halmashauri, Madiwani, Mkurugenzi Mtendaji na Wataalamu wa Halmashauri kwa kushirikiana na kufanya kazi kwa pamoja.

"Nimpongeze Mkuu wa Wilaya, Mwenyekiti wa Halmashauri, Waheshimiwa Madiwani, Mkurugenzi Mtendaji wetu na Wataalamu wetu, matunda yanayotokea Missenyi yanatokana na nguvu ya pamoja, yaani vile utendaji kazi mlionao, ushirikiano na kila kitu, hayo ndio yanayoleta matokeo chanya Missenyi", ameongezea Mhe. Mwasa.

Awali akisoma taarifa fupi ya utekelezaji wa hoja za Mdhibiti na Mkaguzi Mkuu wa Hesabu za Serikali, Mkurugenzi Mtendaji wa Halmashauri ya Wilaya Bw. John Paul Wanga amesema kwamba kwa Mwaka wa fedha 2023/2024 Wilaya ya Missenyi imepata hati safi.

Pia, amebainisha kwamba taarifa ya Mdhibiti na Mkaguzi Mkuu wa Hesabu za Serikali imejumuisha hoja za mwaka wa fedha 2023/2024, hali ya utekelezaji wa hoja za miaka ya nyuma kufikia mwaka wa fedha 2022/2023 pamoja na maagizo ya Kamati ya Kudumu ya Bunge ya Hesabu za Serikali za Mitaa (LAC).

Ambapo amefafanua kuwa, katika mwaka wa fedha 2023/2024, hoja 15 ziliibuliwa na kutolewa mapendekezo, kati ya hoja ziliibuliwa na kutolewa mapendekezo, hoja 10 zimejibiwa kikamilifu na kufungwa na kusalia hoja 5 ambazo ziko katika hatua mbalimbali za utekelezaji.

Kwa miaka ya nyuma hadi kufikia mwaka wa fedha 2022/2023, Halmashauri ilikuwa na hoja 17, kati ya hizo hoja 11 zimejibiwa kikamilifu na kufungwa na kusalia hoja 6 ambazo ziko katika hatua mbalimbali za utekelezaji.

Ameongezea kuwa Halmashauri ilikuwa na maagizo matano kutoka Kamati ya Kudumu ya Bunge ya Hesabu za Serikali (LAC), ambapo  hadi kufikia mwaka wa fedha 2023/2024 Halmashauri ya Wilaya ya Missenyi imefanyia kazi kikamilifu maagizo manne na kusalia na agizo moja ambalo lipo Katika hatua ya utekelezaji.

Aidha, kwa upande wa hoja za Miradi ya Afya, Elimu pamoja na Mfuko wa Wanawake, Vijana na watu wenye ulemavu, Mkurugenzi Mtendaji wa Halmashauri ya Wilaya ya Missenyi amesema kwamba katika mwaka wa fedha 2023/2024 Halmashauri ilikuwa na hoja sita za Miradi ambapo hoja nne zimejibiwa kikamilifu na kufungwa na hoja mbili zipo katika hatua mbalimbali za utekelezaji.

Akifunga Baraza hilo Mwenyekiti wa Halmashauri ya Wilaya ya Missenyi Mhe. Projestus Tegamaisho amemshukuru Mkuu wa Mkoa wa Kagera Mhe. Hajjat Fatma Mwasa kwa kuwa mstari wa mbele katika kuchochea mafanikio katika Mkoa wa Kagera.

Aidha, amelieleza Baraza kwamba amehakikisha katika kipindi chake chote cha miaka 10 akiwa kama Mwenyekiti wa Halmashauri ya Wilaya ya Missenyi, Halmashauri haipati hati chafu au hati yenye mashaka.