HALMASHAURI YAWAKUTANISHA WADAIU WA KILIMO NA TAASISI ZA KIFEDHA

Posted on: September 24th, 2025

Mkurugenzi Mtendaji wa Halmashauri ya Wilaya ya Missenyi Bw. John Paul Wanga leo tarehe 24 Septemba 2024, amefungua Mkutano wa siku moja uliowakutanisha Wakulima, Wafugaji, Wavuvi na Taasisi za fedha kwa lengo la kuonyesha fursa za kiuchumi zilizopo katika sekta ya kilimo, uvuvi na mifugo zinazohitaji wakulima na taasisi za kifedha kuwekeza ili kuinua kipato cha mwananchi mmoja mmoja na Halmashauri kwa ujumla.

Akizungumza na wadau wa kilimo wakati wa ufunguzi wa mkutano huo Bw. Wanga amesema kuwa lengo la kuwakutanisha kwa pamoja ni kuwaunganisha wakulima, wafanyabiashara, wafugaji, wavuvi na wadau wa taasisi za kifedha ili kuwaonesha fursa zilizopo kwenye wilaya kwa ajili kuwekeza kwenye fursa hizo.

“Ninawaomba mshiriki vyema na mtoe ushauri na mapendekezo yenu kwa taasisi za fedha ili wahamishe mawazo yao katika sekta ya kilimo na sio kwa watumishi na wamiliki wa maduka peke yao", amesema Bw. Wanga.

Kwa upande wake Afisa kilimo Bw. Subira John akibainisha fursa zinazopatikana katika sekta ya Kilimo, Uvuvi na Mifugo amesema  kwamba Missenyi ina eneo la kilomita za mraba 2708.75 ambapo takribani hekta 99,726 zinafaa kwa kilimo na kwa sasa karibu hekta 58,840 sawa na 59% ndizo zinazoendelezwa kwa kilimo licha ya kupata mvua mara mbili kwa mwaka kwa wastani wa 800-1,500 mm.

Aidha amebainisha kwamba uwepo wa Mito kama mto Kagera, Mto Ngono pamoja na mabonde, nyanda za chini, maeneo ya tambarare na mabwawa ya asili ni moja ya fursa katika sekta ya kilimo, uvuvi na Mifugo katika Wilaya yetu kwani huwezesha ufanyikaji wa kilimo cha umwagiliaji kwa urahisi.

Ameongezea kuwa bei ya ardhi bado ni rafiki ukilinganisha na maeneo mengine ambapo maeneo mengi katika wilaya ya Missenyi ni takribani shilingi 500,000/= hadi 1,000,000/= kwa ekari isiyoendelezwa hali inayoleta mazingira rafiki kwa anayehitaji kuwekeza.

‘’Fursa zinanzopatikana katika Halmmashauri ya Wilaya ya Missenyi ni pamoja na Uwekezaji kwenye mashamba makubwa ya kahawa aina ya Robusta, usindikaji na ufungashaji kwa ajili ya masoko ya kimataifa, Kilimo cha Miwa na nishati mbadala, Kilimo cha ndizi, Kilimo cha mpunga kwa njia ya umwagiliaji kwa kutumia mabonde na tambarare, Kilimo cha mbegu bora za Nafaka, Kilimo cha bustani au mboga na matunda , uhifadhi na usindikaji wa mazao kama ndizi, mpunga na mahindi”, amesema Bw. Subira.

Kwa upande wake Bw. Labson Mwalusesa ambaye ni Afisa Mikopo kutoka benki ya CRDB amesema kwamba katika furza zilizowasilishwa katika mkutano wa leo bado zina kipaumbele cha kupata mikopo kutoka benki ya CRDB hususan katika eneo la kilimo ambapo mkulima anaweza kupata mkopo wa fedha Taslim kulingana na mazao anayolima na sio fedha Taslim pekee bali unaweza kukopeshwa zana za kilimo endapo utahitaji.

 Bw. Lasbon amesistiza kwamba benki ya CRDB ina fedha nyingi kwa ajili ya Sekta ya Kilimo, Mifugo na uvuvi ingawa bado wakulima hawajajua jinsi ya kutumia fursa hio.

 Kwa mujibu wa Bi. Lucia Musa ambaye ni Afsa mikopo wa benki ya NMB amesema kwamba benki yao inatoa mikopo mizuri kupitia sekta ya kilimo, mifugo na uvuvi kwa riba nafuu ya 16% hivyo wakulima wahakikishe wanatumia fursa hio ili kujikwamua kiuchumi.

Kwa upande wa wakulima, wafugaji na wavuvi waliohudhuria wamewasilisha changamoto zao wanazokumbana nazo hususan katika taasisi za kifadha ikiwa ni pamoja ukosefu wa hati kwani mashamba yao yanapatina maeneo ya ndani yasiofikika kiurahisi, milolongo mirefu kwenye taasisi za kifedha na kukosekana mrejesho, ubadilishwaji wa vigezo mara kwa mara bila sababu za msingi pamoja na kutumia fedha nyingi wakati wa kwenda na kurudi mara nyingi katika benki bila majibu ya kupata mkopo.

Mkutano huo umewakutanisha wadau wa kilimo na taasisi za kifedha umeandaliwa na Ofisi ya Mkurugenzi mtendaji wa Halmashauri ya wilya ya missenyi kupitia divisheni ya Kilimo, Mifugo na Uvuvi.