HALMASHAURI YATOA MIKOPO KWA VIKUNDI VYA WAJASIRIAMALI WANAWAKE, VIJANA NA WATU WENYE ULEMAVu

Posted on: September 5th, 2020

Na Mwandishi wetu.

Halmashauri ya wilaya ya Missenyi imeendelea kutekeleza lengo la kuboresha hali ya maisha ya wananchi kijamii na kiuchumi kwa kutoa mikopo kwa vikundi 23 kwa vijana, wazee na walemavu kwa kipindi cha robo ya nne ya mwaka wa fedha 2019/2020. Mikopo hiyo ni kutekeleza maelekezo ya Serikali ya kuhakikisha asilimia kumi ya mapato ya ndani yanatengwa kwa ajili ya kuwawezesha wajisiliamali wanawake, vijana na walemavu kutekeleza shughurizao za ujasiliamali wenye tija.

Katika hafla ya utoaji mikopo kwa vikundi vya wajasiriamali wanawake,vijana na watu wenye ulemavu iliyofanyika katika Ukumbi wa mikutano wa Halmashauri ya WIlaya ya Missenyi leo Septemba 5/2020 jumla ya Kiasi cha Tshs 82,750,000.00 zimekopeshwa kwa jumla ya vikundi 23 ikiwa ni vikundi 18 vya wanawake (Tsh 58,000,000.00), vikundi vinne vya vijana (Tsh 21,750,000.00) na kikundi kimoja cha watu wenye ulemavu (Tsh. 3,000,000.00). Mikopo hii inatarajiwa kurejeshwa na vikundi husika ndani ya mwaka mmoja  na haina riba.

Kwa mwaka wa fedha 2019/2020 Halmashauri ililenga kutoa mikopo isiyo na riba kwa vikundi vya wanawake, vijana na walemavu yenye thamani ya Tshs. 194,220,000.00. Hadi juni 2020, Halmashauri imetoa mikopo yenye thamani ya Tshs. 194,220,000.00 sawa na asilimia 100 ya lengo la mwaka.

Akisoma taarifa ya utoaji wa mikopo kwa vikundi, Afisa maendeleo ya jamii Bi. Beatrice Sanga amesema manufaa yanayotarajiwa baada ya kutoa mikopo hii ni pamoja na kuwezesha vikundi kupanua mitaji, kuongeza uzalishaji wa bidhaa mbalimbali zitakazo kidhi mahitaji ya soko na kuleta manufaa yaliyokusudiwa kwa walengwa. Manufaa mengine ni kuchochea utengenezaji na upatikanaji wa ajira kwa vijana, kuwaepusha wanufaika na vitendo hatarishi vinavyochochea mmomonyoko wa maadili na uvunjifu wa amani, ukuaji wa uchumi wa kaya na jamii na kupunguza umasikini.  Pia Halmashauri itaongeza mapato kupitia vyanzo vyake vinavyoelekeana na shughuri za wajasiliamali.

Bi Sanga ametaja changamoto ambazo zimekuwa zikijitokeza  katika utoaji wa mikopo ni pamoja na baadhi ya wakopaji kukosa uaminifu kwa kukiuka mikataba , vikundi kubadili matumizi ya fedha walizokopeshwa kinyume na maandiko waliyowasilisha wakati wa kuomba mikopo na mwitikio mdogo wa vijana kuanzisha miradi ya pamoja yenye tija na kuomba mikopo.

Nae Mkuu wa Wilaya ya Missenyi  Col. Denis Filangali Mwila ambaye pia ndiye aliyekuwa mgeni rasmi wakati wa hafla ya kukabidhi mikopo , amevitaka vikundi vilivyopokea mikopo hiyo hasa vijana kuitumia mikopo hiyo kwa lengo lililokusudiwa na kuonyesha mfano wa kuigwa kwa vijana wengine na si kuitumia mikopo hiyo kwa namna isiyo faa.

Ili kufanya zoezi la utoaji mikopo kwa vikundi liwe endelevu,  Halmashauri imeendelea kusimamia urejeshaji wa mikopo kwa vikundi vilivyonufaika kwa kufanya ufuatiliaji wa mara kwa mara na utoaji wa elimu kwenye vikundi husika ili watumie fedha kwa malengo yaliyokusudiwa. Hii itaondoa tatizo la vikundi kufanya matumizi ya fedha za mikopo yasiyoendana na malengo ya mikopo. Sambamba na hilo uhamasishaji umeendelea kufanyika ili vijana wajiunge kwenye vikundi na kuanzisha miradi yenye tija kusudi wapate sifa ya kuomba mikopo inayotolewa na Halmashauri.