HALMASHAURI YA WILAYA YA MISSENYI YAFANYA MAFUNZO KAZINI

Posted on: November 21st, 2022

Halmashauri ya Wilaya ya Missenyi leo terehe 21 Novemba 2021  imefanya mafunzo kazini  kwa watumishi mbalimbali wakiwemo Wakuu wa Divisheni na Vitengo,Watendaji wa Kata na Vijiji,Maafisa elimu Kata, Wakuu wa Shule,Walimu Wakuu na Walimu wa fedha, Waganga wafawidhi na wasimamizi wa fedha katika vituo vya afya na Zahanati.

Mafunzo haya yamefunguliwa na Mkuu wa Wilaya ya Missenyi Kanali Wilson Sakulo ambaye alikua mgeni rasmi akimbatana na Mwenyekiti wa halmashauri Mh. Projestus Tegamaisho na Mkurugenzi Mtendaji wa Halmashauri ya Wilaya ya Missenyi Bw. Waziri Kombo.

Akifungua mafunzo hayo Kanali Sakulo alitaja maeneo ambayo yataangaziwa ambayo ni Maadili ya Mtumishi wa Umma, Mamlaka ya nidhamu ya Mkuu wa shule, Sheria na taratibu za ukusanyaji mapato,Utungaji wa Sheria ndogo za vijiji, Utendaji wa Mabaraza ya Kata, Taratibu za kufuata wakati wa ujenzi wa majengo ya Serikali, Ufuatiliaji na usimamizi wa miradi ya maendeleo, Nyaraka wakati wa ukaguzi na kujibu hoja na mwisho kutatolewa ufafanuzi wa kikokotoo kutoka PSSSF.

‘’Niwatake wote waliohudhuria kuhakikisha mnasikiliza, mnaelewa na hatimaye mafunzo haya yalete  mabadiliko chanya katika utendaji kazi wenu kwani uaandaji wa mafunzo unatumia rasilimali nyingi zikiwemo fedha, muda na rasilimali watu”. Alisema Kanali Sakulo.

Kwa upande wake Mwenyekiti wa Halmashauri Mh. Tegamaisho alimpongeza Mkurugenzi kwa kuhakikisha mafunzo haya yanafanikiwa kwani kipindi cha nyuma wamekua wakipanga ila hawakufanikiwa kutekeleza .

‘’Nimpongeze mkurugenzi kwa kukutanisha watumishi wengi kama hawa kwani kwangu ni mara ya kwanza kukutana na watumishi wengi kama hawa na ninashauri  tufanye mafuzo kama haya angala mara mbili ndani ya mmiaka mitano kwani yataleta ufanisi zaidi”. Alisema Tegamaisho.

Aidha Mkurugenzi mtendaji alisema lengo la mafunzo haya ni kwasababu ya kuwakumbusha watumishi wajibu wao kwa wananchi kwa mujibu wa sheria ya Serikali za Mitaa ya Mwaka 1982 ambapo sheria hii ina ainisha kazi na majukumu zaidi ya 32 ambapo katika uanzishwaji wa mamlaka za serikali za mitaa  lengo  ni kuwarahisishia wananchi katika upatikanaji wa huduma.

“Sisi ni wawakilishi wa Rais wa Jamhuri ya Muungano wa Tanzania katika ngazi zetu hivyo kila mmoja ajiulize na kutafakari kama anamwakilisha vyema mheshimiwa Rais katika nafasi yake, lengo letu la kuletwa hapa ni kuhakikisha Mkoa wa Kagera unapiga hatua za kimaendeleo” Alisema Bw. Kombo

Mafunzo yanatarajiwa kuendesha kwa siku tatu mfululizo kwa kila Tarafa  yaani Tarafa ya Kiziba na Missenyi na katika tarafa ya Kiziba mafunzo yatafanyika katika Ukumbi wa shule ya msingi Mugana ‘B’ na kisha kuhamia katika tarafa ya Missenyi ambapo yatafanyika katika ukumbi wa William Katunzi uliopo makao makuu ya Halmashauri ya Wilaya ya Missenyi.