WATU 43,504 WAMEPIMA VIRUSI VYA UKIMWI WILAYANI MISSENYI KATIKA KIPINDI CHA JANUARI HADI NOVEMBA, 2024

Posted on: December 1st, 2024

Leo 1 Desemba 2024, Tanzania imeungana na Mataifa mengine Duniani kuadhimisha Siku ya UKIMWI Duniani ambapo katika Wilaya ya Missenyi Mkoani Kagera maadhimisho hayo yamefanyika katika Kata ya Bugandika iliyopo katika Tarafa ya Kiziba.

Akifungua maadhimisho hayo kwa kusoma taarifa fupi ya hali ya maambukizi ya Virusi vya UKIMWI katika Wilaya ya Missenyi Mganga Mkuu Wilaya ya Missenyi Dr. Daniel Chochole kwa niaba ya Mkurugenzi Mtendaji wa Halmashauri ya Wilaya ya Missenyi amebainisha kuwa katika kipindi cha Januari hadi Novemba,2024 watu 43,504 wamepima VVU na 386 wamekutwa na maambukizi.

"Kati ya waliopima wanaume ni 14,478 na wanawake ni 29,026, na kati yao waliokutwa na maambukizi ni watu 386 ambapo wanaume ni 144 na wanawake ni 242 sawa na asilimia moja ya watu wote waliopimwa".

Amesema Dr. Daniel Chochole.

Hata hivyo alibainisha kuwa jumla ya wateja 9,687 wanoishi na VVU wanaendelea na huduma za tiba na matunzo katika vituo 30 vya kutolea huduma za afya katika Wilaya ya Missenyi.

Aidha, kwa upande wa Mgeni rasmi katika maadhimisho hayo ambaye ni Katibu Tawala Wilaya ya Missenyi Bi. Mwanaid Mang'uro kwaniaba ya Mkuu wa Wilaya ya Missenyi Kanali (Mst) Hamis Maiga amewataka wenye maambukizi ya Virusi vya UKIMWI kutumia dawa zao kwa usahihi pamoja na kuwataka watu kuachana na mila potofu zinazowafanya kuamini katika tiba mbadala kwamba zinaponya UKIMWI.

"Tukishatambua afya zetu kwamba tuna maambukizi basi tutumie dawa zetu kwa usahihi na tutumie Wataalamu wetu, tutumie tiba za hospitali maana ndio tiba zilizothibitishwa katika kufubaza Virusi Vya UKIMWI". Amesema Bi. Mwanaid Mang'uro.

Maadhimisho hayo yameenda sambamba na utoaji wa huduma mbalimbali za afya, utoaji wa elimu ya ujasiriamali, upatikanaji wa mitaji kwa makundi mbalimbali, utoaji wa elimu ya msaada wa kisheria kwa wahitaji, burudani mbalimbali ikiwa ni pamoja na mchezo wa mpira wa miguu.

Kauli mbiu ya maadhimisho haya kwa mwaka 2024 ni "Chagua Njia Sahihi, Tokomeza UKIMWI".