WATOTO 46,567 KUPEWA CHANJO YA POLIO WILAYANI MISSENYI

Posted on: April 21st, 2022

Watoto wapatao 46,567 wanatarajiwa kupewa chanjo ya Polio wilayani hapa. Akiongea na wajumbe wa kikao cha kamati ya Afya ya msingi katika kikao kilichofanyika leo tarehe 21/04/2022, Mkuu wa wilaya ya Missenyi Kanali Wilson Sakulo ametoa wito kwa wananchi kufanikisha zoezi la utoaji wa chanjo ya polio kwa watoto wenye umri wa chini ya miaka mitano.

 "Wananchi nawaomba mtoe ushirikiano kwa watoa huduma ya afya watakaopita nyumba kwa nyumba ili kutoa huduma hii muhimu hakikisheni hakuna mtoto anayebaki bila kupata chanjo" amesema Kanali Sakulo

Kaimu Mkurugenzi Mtendaji Wilaya ya Missenyi Bi.  Seraphina Rwegasira amewataka wananchi kuungana kwa pamoja katika kupambana na polio kwani Kinga ni bora kuliko tiba

Naye Mratibu wa huduma za afya Mkoa Kagera Bi. Neema Kyamba amesema kuwa mbali na chanjo kutolea nyumba kwa nyumba timu za chanjo pia zitapita kwenye taasisi,masokoni na kwenye maeneo ya Mipaka ili kuhakikisha watoto wote wanapata chanjo.

Tayari mlipuko wa ugonjwa huu umeripotiwa katika nchi jirani ya Malawi hivyo Wizara ya Afya imeamua kuchukua hatua kwa kuanzisha kampeni ya utoaji chanjo kwa watoto nchi nzima.

Chanjo hii inatarajiwa  kutolewa wakati wa Kampeni ya Kitaifa itakayofanyika kuanzia tarehe 28 April 2022 mpaka tarehe 1 Mei 2022 kwa njia yam atone ambapo watoa huduma za afya watapita kaya hadi kaya ili kuhakikisha watoto wote wanaotakiwa kupatiwa chanjo wanafikiwa.