WATAALAMU WA LISHE WATAKIWA KUBORESHA HALI YA LISHE MISSENYI

Posted on: February 20th, 2026

Kaimu Mkuu wa Wilaya ya Missenyi Mheshimiwa Julius Kalanga Laizer ambaye ni Mkuu wa Wilaya ya Karagwe kwa sasa amewataka wataalam wa Lishe wa Halmashauri ya Wilaya ya Missenyi kutoa ufumbuzi wa chakula gani kinaweza kikatumika  ili kuimarisha hali ya lishe katika jamii na kuweza kupata matokeo ya haraka ili kupunguza hali ya udumavu katika jamii.

Ameyasema hayo katika kikao kazi cha kutathmini mkataba wa lishe kwa kipindi cha cha robo ya pili ya Oktoba hadi Desemba kwa mwaka wa fedha 2025/26 kilichofanyika leo tarehe 20 Februari, 2026 katika ukumbi mdogo wa Halmashauri ya Wilaya ya Missenyi.

"Nikweli kwamba tuna makundi hayo sita ya vyakula yanayohitajika lakini kiuhalisia kulingana na hali ya kiuchumi huwezi kuyapata yote kwa pamoja katika mlo mmoja, hivyo ni vyema mkatafakari juu ya kundi gani la chakula linalopatikana kwa urahisi katika jamii yetu kwa ili tuweke nguvu ya kuwaelemisha wananchi ili waweze kutumia na kuondokana na hali duni ya lishe kwa watoto wetu"

Mheshimiwa Laizer alisisitiza kwamba kwa hali ya mkoa wa Kagera na Missenyi kwa ujumla hatupaswi kuwa na utapiamlo kwani kila aina ya chakula inapatikana na tatizo ni utamaduni uliozoeleka wa kutumia chakula kimoja tuu wakati vyakula vingi vinapatikana katika maeneo yetu lakini wananchi wanauza na sio kutumia katika familia zao.

Kwa upande wake Mganga Mkuu wa Halmashauri ya Wilaya ya Missenyi Dkt. Daniel Chochole ameitaka jamii kuzingatia ulaji wa chakula kwa makundi mbalimbali ya vyakula kwani virutubisho havipatikani kwenye chakula cha aina moja tuu bali ni kutoka katika makundi mbalimbali.

"Niendelee kuitaka jamii kuhakikisha inatumia vyakula vilivyopo kwenye maeneo yao vinavyopatikana kwa bei nafuu na vingine sio lazima kununua kwasababu vinapatikana kwenye maeneo yetu ila kulingana na utamaduni wa wananchi wa eneo hili hawavitumii wakidhani ni vyakula duni wakati ndio vyakula vyenye virutubisho" amesema Dkt. Chochole.

Kwa upande wake Afisa Lishe wa Halmashauri ya Wilaya ya Missenyi Bi. Faustina Godwin amewataka wazazi kuhakikisha watoto wanaozaliwa wanapata muda wa kunyonya maziwa ya mama kwa muda wa miezi sita na kuhudhuria kliniki ili kuweza kupimwa hali zao za lishe kwa wakati ili kama kuna tatizo la lishe liweze kugundulika mapema na kupatiwa suluhisho.

Makundi hayo ya vyakula yaliyobainishwa ni pamoja na  vyakula vya nafaka, ndizi mbichi na mizizi yenye wanga, pili ni vyakula vya asili ya wanyama, tatu ni vyakula jamii ya mikunde , kokwa na mbegu zenye mafuta, nne ni ni matunda,  tano ni Mbogamboga na sita ni Mafuta.

Katika kikao hicho Kaimu Mkuu wa Wilaya ya Missenyi Mheshimiwa Julius Kalanga Laizer alikabidhi vitendea kazi vya kufanikisha shughuli za lishe ikiwa pamoja na vifaa, virutubishi na Chakula dawa vyenye thamani ya shilingi milioni 17.4 vilivyogawiwa kwa shule za Msingi na Sekondari, Hospitali, Vituo vya Afya na Zahanati.