WALIOVAMIA MSITU WA BUSHENYA WATAKIWA KUONDOKA IFIKAPO MACHI 30, 2025

Posted on: February 14th, 2025

Wananchi waliovamia msitu wa Bushenya Wilayani Missenyi wametakiwa kuhakikisha wanavuna mazao yao na kuondoka katika msitu huo mpaka kufikia tarehe 30/03/2025.

Akizungumza na vyombo vya habari leo Februari 14, 2025 katika Ukumbi mdogo wa Halmashauri ya Wilaya ya Missenyi Mkuu wa Wilaya ya Missenyi Mhe. Kanali (Mst) Hamis Maiga amebainisha kwamba kwa mipango iliyowekwa kwasasa watakapowaondosha wananchi hao waliovamia eneo la msitu hawatarudi tena katika eneo hilo.

"Kwa historia ya hili jambo oparesheni nyingi zimefanyika pale na hazina mafanikio, nataka niwahakikishie tulivyojipanga mara hii tutakapowaondosha hawatarudi, kwasababu uondoshaji wa mwaka huu umeangalia mapungufu yaliyotokea kwenye uondoshaji wa miaka ya nyuma". Amesema Kanali (Mst) Hamis Maiga.

Kwa upande wake Mkurugenzi Mtendaji wa Halmashauri ya ya Missenyi Bw. John Paul Wanga amesema kwamba wananchi waliopo katika msitu wa Bushenya hawatambuliki kwa mujibu wa sheria.

"Wananchi walioko kule ndani ya msitu hawatambuliki na sheria zetu za Serikali za mitaa, kwasababu ili utambulike lazima Kijiji kianzishwe kwa mujibu wa sheria na Mheshimiwa Rais hajaanzisha Kijiji cha Bushenya". Amesema Bw. John Wanga.

Aidha ameongeza kuwa Wananchi wanaolalamika ni wavamizi na wanatakiwa kuondoka katika msitu huo na eneo hilo litatumika kwa shughuli rasmi za mazoezi ya kijeshi na hawatagusa vijiji vilivyopo jirani na eneo hilo bali watajihusisha na eneo la hekta 9000 tu.

Kutokana na uvamizi wa wananchi katika msitu huo, mpaka sasa eneo lililovamiwa ni wastani wa hekta 4000 ambapo hekta 5000 zimeonekana hazina tatizo na uvamizi huo umepelekea kutoweka kwa viumbe na mimea mbalimbali ya porini, uharibifu wa misitu, kukauka na kupungua kwa vyanzo vya maji kama vile mito na maziwa madogo ya Kayanja na Byeju.

Mkutano huo na Waandishi wa Habari ulihudhuriwa pia na Viongozi wa Kata, Vijiji na Vitongoji vinavyopakana na msitu huo wa Bushenya unaomilikiwa na Halmashauri ya Wilaya ya Missenyi.