WAJUMBE KAMATI YA LISHE WILAYA YA MISSENYI WAFANYA KIKAO CHA ROBO YA KWANZA YA MWAKA 2024/2025

Posted on: December 5th, 2024

Leo Desemba 5, 2024 Halmashauri ya Wilaya ya Missenyi imefanya Kikao cha Kamati ya lishe kikiwa na lengo la kujadili utekelezaji wa shughuli za lishe kwa Wajumbe wa Kamati ya Lishe ya Wilaya kwa kipindi cha robo ya kwanza kuanzia Julai hadi Septemba 2024.

Akizungumza katika kikao hicho Mwenyekiti wa Kikao ambaye ni Mkurugenzi Mtendaji wa Halmashauri ya Wilaya ya Missenyi Bw. John P. Wanga amesema kwamba lishe inayoangaliwa si ya kimuonekano tuu bali na kiakili ili tuwe na taifa lenye watu wenye uwezo wa kuchanganua mambo ili kusaidia kupiga hatua kimaendeleo katika Taifa letu.

Aidha, ameiagiza Divisheni ya Afya, Ustawi wa jamii na Lishe kuhakikisha wanashirikiana na viongozi katika serikali za vijiji kuhakikisha inatambua idadi ya watoto wenye udumavu na kutoa elimu ya udumavu kupitia mikutano ya vijiji na kuhamasisha wananchi kulima mazao kama mbogamboga na matunda katika maeneo yao kwa lengo la kuboresha lishe kwa watoto na familia kwa ujumla.

Kikao hicho kimefanyika katika Ukumbi mdogo wa Halmashauri ya Wilaya ya Missenyi na kuhudhuriwa na wajumbe mbalimbali wanaotekeleza afua za lishe ikiwa ni pamoja na Divisheni ya Afya, Ustawi wa jamii na Lishe, Divisheni ya Elimu Awali na Msingi, Elimu Sekondari, Kilimo, Mifugo na Uvuvi, Maendeleo ya Jamii na wadau wengine ambao ni RUWASA na Taasisi isiyo ya Kiserikali ya Kikukwe Community Development Initiatives (KCDI).