UTEKELEZAJI WA BAJETI MISSENYI WAFIKIA 87%

Posted on: January 25th, 2024

Leo tarehe 26/01/2024 Baraza la Madiwani katika Halmashauri ya Wilaya ya Missenyi limefanya mkutano maalum wa Baraza la Madiwani kwa ajili ya Mpango na Bajeti ya mwaka wa fedha 2024/2025.

Katika kufanya mapitio ya mapato ya ndani kwa kipindi cha nusu mwaka yaani kuanzia Julai 2023 hadi Desemba 2023 , Mkurugenzi Mtendaji wa Halmashauri ya Wilaya ya Missenyi Bw. John Paul Wanga  alilieleza Baraza la Madiwani kwamba katika mwaka wa fedha 2023/2024 Halmashauri iliidhinishiwa kukusanya shilingi bilioni 4.2  na mpaka kufikia Desemba 2023 Halmashauri imefanikiwa kukusanya shilingi bilioni 3.8 sawa na aslimia 87 ya makusanyo ya mwaka wa fedha 2023/2024.

Aidha alieleza kwamba katika mpango na bajeti wa mwaka wa fedha 2024/2025, Halmashauri itaomba kuidhinishiwa jumla ya shilingi bilioni 37.6 kwa ajili ya matumizi ya kawaida na miradi ya maendeleo ambapo ruzuku ya mishahara  ni shilingi bilioni 20.0,  matumizi ya kawaida shilingi bilioni 1.0, miradi ya maendeleo na wahisani shilingi bilioni 9.6 na mapato ya ndani shilingi bilioni 6.8.

Rasimu hii ya bajeti ya mwaka wa fedha 2024/2025 inaongezeko la shilingi bilioni 2.4 sawa na aslimia 07 ikilinganishwa na bajeti ya mwaka wa fedha 2023/2024 iliyokuwa shilingi bilioni 35.1 ambapo ongezeko hili linatokana na fedha za mapato ya ndani kuongezeka kutoka shilingi bilioni 4.4 kwa mwaka 2023/2024 hadi kufikia bilioni 6.8 kwa mwaka 2024/2025 sawa na ongezweko la asilimia 55 ya mapato ya ndani pekee.

‘’Kutokana na ongezeko hili la Mapato ya ndani tumepanga kupeleka asilimia 60 ya mapato ya ndani kwenye miradi ya maendeleo kwa mwaka wa fedha 2024/2025 badala ya asilimia 40 kama ilivyokua kipindi cha nyuma” alisema Mkurugenzi Wanga.

Alisisitiza kwamba Halmashauri imejipanga kutekeleza miradi mikubwa ambapo tumetenga shilingi bioni moja kwa ajili ya uendelezaji wa gulio la Bunazi Pamoja na kuendele kuimarisha ulinzi na usalama, kuweka msukumo maalum wa kuboresha Sekta ya elimu ya Msingi na Sekondari, kupima na kutenga maeneo ya uwekezaji na kuboresha maeneo maalum ya shughuli za viwanda na biashara.

Pia kuendeleza sekta ya mifugo na masoko, kuimarisha sekta Uvuvi, sekta ya kilimo na  kutilia mkazo kilimo cha mazao ya kimkakati, kuweka msukumo wa ujenzi na ukarabati wa miundombinu ya Afya, Elimu, Maji na Barabara na kuimarisha matumizi ya mifumo ya Kielektroniki katika ukusanyaji wa mapato ili kuongeza ufanisi.

Alimshukuru Mheshimiwa Rais wa Jamhuri ya Muuungano Dkt. Samia Suluhu Hassan kwaniaba ya Baraza la Madiwani na Timu ya Menejimenti kwa kuipatia Halmashauri ya Missenyi fedha nyingi za miradi ya maendeleo ilioimarisha sekta za Afya, Elimu, Maji, Umeme na Barabara ili kurahisisha ufikishaji wa huduma kwa wananchi wa Missenyi