UBALOZI WA JAPAN WAKABIDHI MRADI WA BWENI LENYE THAMANI YA TSHS MILIONI 270.1 KAGERA SEKONDARI

Posted on: December 12th, 2024

Leo Desemba 12, 2024 umefanyika uzinduzi wa Mradi wa Bweni la wasichana lenye thamani ya Shilingi milioni 270.1 lenye uwezo wa kupokea wanafunzi 120 katika Shule ya Sekondari Kagera iliyopo Kata ya Kyaka katika Wilaya Missenyi.

Mradi huo uliofadhiliwa na Serikali ya Japan kupitia Ubalozi wake nchini Tanzania na kutekelezwa na Taasisi ya MAPEC iliyopo Kata ya Kyaka Wilayani Missenyi ulianza kutekelezwa tarehe 2/5/2024 na kukamilika kabla ya muda tarehe 12/12/2024.

Akisoma taarifa ya ujenzi wa mradi huo Mkurugenzi Mtendaji kutoka Shirika lisilo la Kiserikali la MAPEC Bw. George Buberwa Kachumita amesema kwamba lengo la mradi huo ni kuinua kiwango cha ufaulu kwa kutatua changamoto ya ongezeko la watoto wa kike kushindwa kumaliza shule kutokana na kutembea umbali mrefu kutoka nyumbani kwenda shule kwa wastani wa Kilomita 12 Kila siku.

Kwa upande wake Mkuu wa Wilaya ya Missenyi Kanali (Mst) Hamis Maiga kwaniaba ya Mgeni rasmi wa hafla hiyo ambaye ni Mhe. Mkuu wa Mkoa wa Kagera Hajjat Fatma Mwassa ameishukuru Serikali ya Japan kupitia Ubalozi wake nchini Tanzania kwa kufadhili mradi huo wa ujenzi wa Bweni kupitia Shirika la MAPEC lenye Makao Makuu yake katika Kata ya Kyaka.

Kwa upande wake Mhe. Naibu Mkuu wa Ujumbe wa Japan nchini Tanzania Bw. Shoichi Ueda amesema kwamba anafuraha kusikia kwamba kukamilika kwa mradi huo kutanufaisha jumla ya wasichana 120 wa Shule ya Sekondari Kagera na anatumaini kwamba ujenzi wa Bweni hilo utafanya maisha ya wanafunzi wa kike kuwa ya furaha na utulivu zaidi.

Mradi huo wa Bweni la wasichana umegawanyika katika sehemu tatu ambazo ni sehemu ya kulala wanafunzi yenye vitanda 60 vya kulaza wanafunzi wawili na kabati 30 za kutunzia vitabu kwa wanafunzi wanne kwa kila kabati, nyumba ya matroni kwaajili ya malezi na usalama wa wanafunzi wakati wote wawapo shuleni, Vyoo, bafu na karo za kufulia nguo.

Aidha, jengo limefungwa mfumo maalum wa usalama wa kuweza kuhisi mapema na kutoa mlio wa tahadhali ya ajali ya moto.