TUME HURU YA TAIFA YA UCHAGUZI YAJIRIDHISHA NA UTARATIBU WAKUBADILI JINA LA JIMBO LA UCHAGUZI NKENGE

Posted on: April 25th, 2025

Leo Aprili 25, 2025 Tume Huru ya Taifa ya Uchaguzi imefanya kikao na wadau wa uchaguzi katika Halmashauri ya Wilaya ya Missenyi na kujiridhisha kuwa utaratibu wa kubadili jina la Jimbo la uchaguzi kutoka Nkenge na kuwa Missenyi umefuatwa.

Akizungumza katika Kikao hicho cha kupitia maombi ya kubadili jina la Jimbo la uchaguzi la Nkenge, Makamu Mwenyekiti wa Tume Huru ya Taifa ya Uchaguzi Mhe. Jaji Rufaa (Mst) Mbarouk Salim Mbarouk amesema kwamba kwa mujibu wa kanuni ya 18 ya kanuni za Tume huru ya Taifa ya Uchaguzi ya mwaka 2024, Tume imechagua kutembelea majimbo yote yalioomba kubadilisha jina kwa lengo ya kujiridhisha iwapo taarifa hizo zilizopo kwenye maombi yaliyowasilishwa ni sahihi kuhusu jimbo husika.

Aidha, amewapongeza wajumbe katika Kikao hicho kwa kukubaliana kwa kauli moja kuwa maombi yaliyowasilishwa ni sahihi na yalifuata utaratibu.

"Nawapongeza kwa kuifanya kazi yetu kuwa nyepesi na kwa kauli moja mmekubaliana kuwa maombi yaliyowasilishwa ya pendekezo la kubadili jina la Jimbo la Nkenge katika Halmashauri ya Wilaya ya Missenyi Mkoani Kagera ni sahihi kwa mujibu wa barua iliyowasilishwa na Katibu Tawala wa Mkoa". Amesema Mhe. Mbarouk.

Pia amesisitiza kuwa kufanyika kwa kikao hicho haina maana kuwa ombi la kubadili jina la Jimbo la uchaguzi limekubaliwa.

"Tunawasihi kwamba kikao hiki haina maana kuwa sasa ombi lenu limekubaliwa bali Tume huru ya Uchaguzi imetimiza matakwa ya kanuni ya 18 ya kanuni za Tume Huru ya Taifa ya Uchaguzi ya mwaka 2024 za kutembelea majimbo yaliyoomba kubadilisha jina la Jimbo, hivyo Tume itakutana na kuendelea kuchakata taarifa zote na baada ya hapo kwa kuzingatia mashariti ya Katiba na Sheria itatangaza majimbo yaliyogawanywa na yaliyobadilishiwa majina". Amesema Mhe. Mbarouk.

Kikao hicho baina ya Tume Huru ya Taifa ya Uchaguzi na wadau wa Uchaguzi katika Halmashauri ya Wilaya ya Missenyi kilikuwa na lengo la kujiridhisha kama utaratibu wa vikao vilivyopangwa Kisheria kwa maana ya kikao cha Baraza la Halmashauri ya Wilaya ya Missenyi, Kikao cha Kamati ya Ushauri ya Wilaya (DCC) na Kikao cha Kamati ya Ushauri ya Mkoa (RCC) vilikaa na kupendekeza maombi hayo.

Hata hivyo, Wajumbe katika Kikao hicho wamethibitisha kuwa vikao hivyo vilifanyika na kwa kauli moja wamekili kuwa maombi ya kubadili jina la Jimbo la Nkenge ni sahihi.