TEGAMAISHO ARIDHISHWA NA KASI YA UJENZI WA HOSPITAL YA WILAYA

Posted on: April 14th, 2022

Mwenyekiti wa Halmashauri ya Wilaya ya Missenyi Mh. Projestus Tegamaisho ameridhishwa na mwenendo wa ujenzi wa hospital ya wilaya ya Missenyi unaotekelezwa katika kijiji cha Bulembo, kata ya Mushasha Wilayani hapa.

Hayo ameyasema leo April 13, 2022 wakati kamati ya Fedha Utawala na Mipango ilipokuwa katika zoezi la ukaguzi wa miradi ya maendeleo inayotekelezwa kwa kipindi cha mwaka wa Fedha 2021/2022.

Wakati huohuo, Mwenyekiti amemuagiza mkaguzi wa ndani kufanya ukaguzi wa ujenzi wa Hospital ya Wilaya na Kituo cha Afya kanyigo ili kujiridhisha na thamani ya Fedha.

“Tumeridhika na kasi ya ujenzi wa miradi tuliyokagua leo yenye thamani ya shilingi bilioni 2.2 na pia namuagiza mkaguzi wa ndani ya halmashauri kukagua mradi wa ujenzi wa hospitali ya Wilaya pamoja na Kituo Cha Afya Kanyigo ili kujiridhisha na thamani ya fedha kwenye miradi hiyo" Amesema Tegamaisho

Wajumbe wa kamati hiyo Mh. Yusuph Mzumbe(Kassambya) na Mh. Willy Mutayoba (Kitobo) hawakusita kuipongeza kamati ya Ujenzi wa Hospital kwa usimamizi wao mzuri wa ujenzi wa hospital hiyo.

Naye Mh. Richard Mbekomize, Diwani kata ya Kakunyu ameishauri serikali kuanza ujenzi wa nyumba za watumishi kwa ajili ya watumishi watakaopangwa katika hospitali hii pindi itakapokamilika.

Mradi huu wa ujenzi wa Hospital ya Wilaya hadi sasa umegharimu kiasi cha Tsh. Bilioni 1.3 fedha kutoka Serikali kuu.

Picha: Jengo la maabara Hospital ya Wilaya Missenyi