RC SHIGELA AFANYA ZIARA KATIKA MPAKA WA MUTUKULA.

Posted on: June 28th, 2023

Kaimu Mkuu wa Mkoa wa Kagera ambaye pia ni Mkuu wa Mkoa wa Geita, Mhe. Martine Shigela leo tarehe 28 June, 2023 amefanya ziara ya siku moja katika Wilaya ya Missenyi.

Akiwa Missenyi ametembelea kituo cha pamoja cha forodha cha Mutukula, amekagua eneo la mpaka kati ya Tanzania na Nchi ya Uganda , amezungumza na watumishi wa kituo hicho   pamoja na kufanya mkutano na wafanyabiashara wa Wilaya ya Missenyi hususan wanaotumia mpaka wa Mutukula kusafirisha Mazao na bidhaa mbalimbali.

Akizungumzia juu ya sheria ndogo ya Halmashauri ambapo wafanyabiashara waliataka kupata ufafanuzi juu ya uwepo wa sheria ya usafirishaji na upitishaji wa mazao katika Wilaya ya Missenyi aliwataka wafanyabiashara wote wanaotumia mpaka wa Mutukula kuwa wavumilivu na kuendela kufuata utaratibu wa ulipaji wa Ushuru kwa mujibu wa sheria ndogo ya Halmashauri iliyopo sasa.

 Aidha aliagiza Ngazi ya Wilaya, Halmashauri ya Wilaya ya Missenyi,Uongozi wa Mkoa na Wafanyabiashara kupitia sheria ndogo ya Halmashauri inayohusiana na usafirishaji wa mazao ili kuweka makubaliano juu ya namna bora ya ukusanyaji wa tozo kupitia biashara ya Mazao.

“Nimefarijika sana kuona wafanyabiashara wa Wilaya ya Missenyi wako tayari kulipa kodi hivyo niwakumbushe kwamba Halmashauri haitaweza kujiendesha na kutoa huduma kwa wananchi endapo ushuru hautalipwa, hivyo ni vyema ukawekwa utaratibu ambao Halmashauri itapata mapato na wananchi wakafanya biashara bila kuwa na kikwazo chochote" Alisema Mhe. Shigela

Kwa upande wake Katibu Tawala wa Mkoa wa Kagera Ndg. Toba Nguvila ameeleza kuwa kutokana na agizo la Mheshimiwa Rais wa Jamhuri ya muungano wa Tanzania Samia Suluhu Hassan kuruhusu mazao kuendelea kusafirishwa nje ya Nchi kwa masharti ya mfanyabiashara awe amekidhi vigezo pamoja na kufuata taratibu zote za ikiwa ni pamoja na vibali  vinavyotakiwa.

"Sisi kama uongozi tumefika mpakani hapo ili kuona shughuli za kiutendaji na kupokea changamoto za wafanyabiashara zinazotokana na agizo hilo" Alisema Bw. Nguvila.

Kwa upande wake Mwenyekiti wa Wafanyabiashara Wilaya ya Missenyi, Bw. Sakibu Seleman ameeleza kwamba wao wanaomba waendelee kulipia ushuru wa mazao kwa gari kama ilivyokua kipindi cha nyuma na sio kwa gunia ilivyo sasa ambapo kila gunia moja walikua wanlinalipa tshs 1,600/- wakati ukilipa kwa gari zinazojulikana kwa majina maarufu ya aina ya Semi ilikua tshs 140,000/-,  Tandam 90,000/- na Fuso ilikua tshs 60,000/- ambapo ukilipa kwa gunia inakua gharama sana.

Kwa upande wa Halmashauri ya Wilaya ya Missenyi akitoa ufafanuzi juu utozaji wa ushuru wa mazoa Bw. Dotto Mayombo alisema kwa mujibu wa sheria ndogo za Halmashauri ya mwaka 2019/2020 imebainisha wazi kwamba kila gunia la kilo 100 litatozwa tshs 2,000 ingawa kwa sasa tunatoza tshs 1,600/- kwa kila gunia na tunarajia kuanzia mwaka wa fedha utakaoanzia 01 July 2023 tutaanza kutoza tshs 2,000 kama sheria inavyoelekeza.