RC CHALAMILA: NIMEKUA SHAHIDI MZURI JUU YA MIRADI INAYOTEKELEZWA MKOA WA KAGERA

Posted on: February 4th, 2023

Mkuu wa Mkoa wa Kagera Mheshimiwa Albert Chalamila leo tarehe 03 Februari 2023 amehitimisha ziara ya siku tatu katika halmashauri ya wilaya ya Missenyi kwa kuweka jiwe la msingi na kufanya mkutano wa hadhara katika mradi wa jengo la abiria katika Stendi ya Kyaka.

Mhe. Chalamila alisema kwamba wapo baadhi ya watu wanadhani kwamba mkoa wa kagera hakuna maendeleo yanayofanyika ila yeye amekua shahidi juu ya mambo mazuri yanayoendelea katika mkoa wa kagera na maendeleo haya ndio ambayo Mheshimiwa Rais wa Jamhuri ya Muungano wa Tanzania anayoyataka.

Kwa upande wake Mhe. Mkuu wa Wilaya ya Missenyi kanali Wilson Sakulo alimpongeza na kumshukuru Mheshimiwa Rais wa Jamhuri ya Muungano wa Tanzania kwa kumuamini na kumteua na kumbakiza katika wilaya hii ya Missenyi na kuahidi kuendelea kuwatumikia wananchi kwa mujibu wa taratibu za serikali yetu pamoja na kutoa ushirikiano ili tuweze kuyafikia maendeleo.

Mwenyekiti wa halmashauri ya Wilaya ya Missenyi Mhe. Projestus Tegamaisho ambaye pia ni Diwani wa kata ya Kyaka wakati akitoa ufafanuzi alisema ujenzi wa stendi ya Kyaka umekuwa na manufaa makubwa ambapo abiria wamepata eneo la kupumzikia wakata wanasubiria magari kwani wamekua wakisumbuliwa na vipindi vya jua na mvua kwa kukosa sehemu ya kujihifadhi.

"Kuna ongezeko la vijana na wanawake wanaofanya shughuli za ujasiriamali , mapato ya Halmashauri yatokanayo na ushuru wa choo, magari yanayoingia na kutoka stendi, pia mradu huu umeongeza pato la mwananchi hususani kwa wakazi wa Kata ya Kyaka" alisema Mhe. Projestus.

Akitoa taarifa ya Mradi Afisa Mipango wa Halmashauri ya Wilaya ya Missenyi Bw. Julian Tarimo alisema Halmashauri iliamua kujenga stendi ya Kyaka kwa awamu ambapo awali ilipata eneo na kulipia fidia, kupima viwanja na kuwagawia wafanyabiashara walioomba kujenga vibanda zilifanyika, kujenga miundombinu kama Jengo la wauza Gonja, Kituo cha Polisi, Choo na Kizimba cha kutupia taka.

Katika kuboresha miundombinu ya stendi ya abiria Kyaka,kwa mwaka wa fedha 2021/2022 Halmashauri ya Wilaya ya Missenyi ilitenga kiasi cha shilingi milioni 37 kutoka mapato yake ya ndani kwa ajili ya ujenzi wa jengo la abiria ambapo Mradi huu ulianza 18 Septemba 2022.