MRADI WA LISHE SHULENI WAZINDULIWA MISSENYI

Posted on: July 22nd, 2025

Leo Julai 22, 2025 Shirika la Global Alliance for Improved Nutrition (GAIN) limetambulisha mradi wa Lishe shuleni (Lishe Shuleni Project) kwa Wilaya ya Missenyi wenye lengo la kuimarisha hali ya lishe katika Shule za Msingi na Sekondari Wilayani humo.

Utambulisho huo umeenda samabamba na uzinduzi wa mradi ambapo Mkuu wa Wilaya ya Missenyi Mhe. Hamis Maiga ameuzindua mradi huo, na kuanza kufanya kazi rasmi kwa Wilaya ya Missenyi.

Akizungumza katika utambulisho na uzinduzi wa mradi huo Meneja Mradi wa urutubishaji chakula kutoka GAIN Bw. Archard Ngemela amesema kwamba mradi huo unatekelezwa katika Halmashauri tatu za Mkoa wa Kagera ambazo ni Muleba, Bukoba Vijijini na Missenyi.

Ameongezea kuwa mradi huo unalenga kufanya kazi na Shule pamoja na jamii ili kuweza kuzalisha vyakula vilivyorutubishwa kibaiolijia.

Aidha, amesema kuwa wamelenga kufanya kazi na Kata sita kila Halmashauri, ambapo kila Kata itatoa Shule moja ya Sekondari na mbili za msingi ili kushiriki katika mpango huo, hivyo katika kila Halmashauri watafanya kazi na Shule za Msingi 12 na Sekondari sita.

Kwa upande wake Kaimu Mkurugenzi Mtendaji wa Halmashauri ya Wilaya ya Missenyi Bi. Tapita Tuvana amesema kwamba vigezo vilivyotumika kupata Shule zitakazokwenda kuwakilisha mpango huo ni pamoja na wingi wa  Wanafunzi katika Shule hizo, Upatikanaji wa maeneo ya kilimo katika Shule husika lakini pia kuangalia Shule zenye wanafunzi wenye mahitaji maalumu pamoja na hali ya lishe katika Shule husika.

Aidha, amebainisha Kata na Shule zitakazoshiriki katika mradi huo kwa Wilaya ya Missenyi ambapo amesema katika Kata ya Kakunyu, Shule za Msingi Bubale na Bwenkoma pamoja na Shule ya Sekondari Kakunyu zitashiriki.

Kata ya Nsunga Shule za Msingi Omulungando na Byamutemba pamoja na Shule ya Sekondari Nsunga zitashiriki. Hivyo hivyo, katika Kata ya Kassambya Shule za Msingi Bunazi 'B' na Gabulanga pamoja na Shule ya Sekondari Gabulanga zitashiriki.

Kwa upande wa Kata ya Kyaka Shule za Msingi Kyaka na Kimkunda pamoja na Shule ya Sekondari Kagera zitashiriki, ambapo kwa Kata ya Kilimilile Shule za Msingi Mwemage na Mabale pamoja na Shule ya Sekondari Kilimilile zitashiriki pia.

Tarafa ya Kiziba imetoa Kata moja ya Kitobo ambapo Shule za Msingi Mbale na Kayanga pamoja na Shule ya Sekondari Bwabuki zitashiriki katika mradi huo.

Mradi huu utatekelezwa kwa muda wa miezi 12 ambapo Shule hizo zitawezeshwa kupata mbegu za maharage lishe, mahindi lishe na viazi lishe ili ziweze kulima katika maeneo ya Shule na washirikiane na Maafisa Kilimo wa maeneo husika, vile vile sehemu ya mpango huu inarudi kwa jamii husika ambapo zenyewe zitapewa mbegu na Wataalamu wanaopatikana kwenye Kata ili waweze kuzalisha chakula kilichorutubushwa.