MRADI MPYA WA BOOST KUJENGA VYUMBA 12,000 VYA MADARASA

Posted on: December 22nd, 2022

Mafunzo Elekezi kuhusu Mradi wa BOOST yanayofanyika kikanda yameanza leo tarehe 22 Disemba 2022 katika kanda ya Ziwa Magharibi inayojumuisha Mkoa wa Kagera na Kigoma ambapo jumla ya Maafisa 207 kutoka ngazi ya Halmashauri na Mikoa wanatarajiwa kupata mafunzo haya katika kanda hii.

Mafunzo haya yalioandaliwa na Ofisi ya Rais TAMISEMI na yatafanyika kwa siku mbili katika Mkoa wa Kigoma katika chuo cha Ualimu cha KASULU kilichopo katika Wilaya ya Kasulu.

Mradi wa BOOST utagharimu shilingi Trilioni 1.15 kwa nchi nzima na unalenga kujenga jumla ya vyumba vipya vya madarasa 12,000 katika shule za msingi na kuwesha kutekeleza mpango wa shule salama katika shule za msingi 6,000 hapa nchini.

Mradi unatekelezwa hapa nchini kwa kipindi cha miaka 5 kuanzia mwaka 2021/2022 hadi mwaka 2025/2026 na kunufaisha halmashauri zote 184 hapa nchini hususani katika kuboresha miundombinu ya elimu ya Awali na Elimu Msingi.

Aidha Mradi wa BOOST unatarajiwa kuboresha mazingira ya ujifunzaji na Ufundishaji, Ujuzi na Ubora wa walimu katika ufundishaji, pamoja na kuimarisha upatikanaji wa rasilimali za utoaji huduma za elimu ngazi ya Halmashauri Pamoja na kuongeza uwiano wa uandikishaji wa wanafunzi wa elimu ya awali kutoka asilimia 76.9 hadi kufikia asilimia 85 mwaka 2025/2026.

Ikumbukwe kwamba mradi huu unatekelezwa kwa mfumo wa lipa kutokana na matokeo yanayopatikana hivyo Halmashauri ambazo zitatimiza vigezo kwa kiwango kikubwa ndizo zitakazonufaika zaidi kwa kupatiwa fedha nyingi za kuboresha miundombinu pamoja na ununuzi wa vifaa na vitendea kazi kwa elimu ya Awali na Msingi.

Wajumbe wa timu za usimamizi wa mradi wa BOOST ngazi ya Halmashauri inajumuisha Afisa Elimu Msingi, Afisa Maendeleo ya Jamii, Mhandisi, Mwalimu Mkuu, Afisa Manunuzi, Mthibiti Ubora wa Shule, Afisa Ustawi wa Jamii, Afisa Elimu Kata, Afisa Mipango, Afisa Habari na Mratibu wa Mradi wa BOOST na ngazi ya Mkoa inaundwa na Afisa Elimu Mkoa, Mratibu wa Mradi wa BOOST, Mhandisi, Afisa Habari, Afisa Maendeleo ya Jamii, Afisa Ustawi wa Jamii, Afisa Mipango na Mthibiti Ubora wa Shule Kanda.