MITI 500 YAOTESHWA KATIKA MAADHIMISHO YA MIAKA 62 YA UHURU.

Posted on: December 9th, 2023

Katika kuadhimisha miaka 62 ya Uhuru, Halmashauri ya Wilaya ya Missenyi wameadhimisha kwa kufanya matembezi ya hiaria kuanzia eneo la TRA Kyaka na kuhitimishwa katika Shule ya Msingi Bunazi "B" kwa kupanda miti ya kivuli, matunda na mbao.

Jumla ya miti ya kivuli na mbao 500 iliotolewa na TFS Missenyi ilioteshwa katika eneo la shule Mpya ya Msingi ya Bunazi "B" iliojengwa kwa thamani shilingi milioni 540 kupitia mradi wa BOOST kwa ajili ya kuboresha mazingira ya ujifunzaji na ufundishaji.

Akizungumza na wananchi wa Wilaya ya Missenyi Mkurugenzi Mtendaji wa Halmashauri ya Wilaya ya Missenyi Bw. John Paul Wanga kwaniaba ya Mheshimiwa Mkuu wa Wilaya ya Missenyi Kanali Wilson Sakulo ambaye alitarajiwa kuwa Mgeni rasmi katika maadhimisho haya alisema zoezi hili zi zuri na limetoa hamasa na kutoa elimu ya uhifadhi wa mazingira kwa walioshiriki matembezi haya ya hiari kwani wanachi wamekua na tabia ya kufyeka, kuvamia na kukata miti na misitu bila taratibu.

"Tunamshukuru TFS kwa zoezi hili ila bila kumsahau mwekezaji Mzalendo KADERES ambaye ana miche milioni moja ya parachichi aina ya HASS na ametupatia miche laki moja ambayo halmashauri tumekubaliana kuigawa katika taasisi za serikali kama zahanati, vituo vya afya, shule za msingi, sekondari  ili kuimarisha lishe, kuongeza kipato cha taasisi husika kupitia uuzaji wa matunda na uhifadhi wa mazingira na uuzaji wa hewa ya ukaa" Alisema Bw. Wanga.

Niwatake wananchi kuheshimu sheria waache uchomaji hovyo wa moto wakati wa uuandaaji wa mashamba kwani upo utaratibu mzuri kupitia wataalamu wetu waliopo kwenye kata wanaweza wapewa maelekezo juu ya namna bora ya kuteketeza masalia ya mazao katika mashamba yao.


Kwamujibu wa Meneja wa TFS - Missenyi Bw. Mrisho Juma alisema kwamba kushiriki katika maadhimisho haya moja kwa moja kwa kutoa miche ya miti 500 pamoja na kushiriki katika kuipanda ili kuweka  alama ya kumbukumbu  ya uhifadhi.

Aidha, alitoa rai kwa jamiii na wadau kuenndelea kushirikiana na serikali katika kuhakikisha wanalinda na kuendeleza rasilimali za misitu zilizopo nchini.

Alisitiza kwamba kwa mwaka wa fedha 2023/24 TFS ina mpango wa kusambaza miche laki moja ambapo mpaka sasa wamefanikiwa kusambaza miche elfu ishirini na mbili katika taasisi za serikali ikiwa ni pamoja na shule za msingi, sekondari  na watu binafsi.

"Nitoe rai kwa wananchi waepuke ukataji wa miti hovyo usiozingatia taratibu pamoja na kuacha tabia ya uchomaji moto hovyo ambao ni hatarishi kwa misitu tulionayom ambapo uchomaji huu umekua janga kubwa katika Wilaya yetu linalopelekea uharibifu mkubwa wa mazingira" Alisema Bw. Mrisho.

Maadhimisho haya yalihudhuriwa na watumishi wa taasisi mbalimbali za serikali na zisizo za serikali na wanachi wa Wilaya ya Missenyi na Kauli mbiu ya maadhimisho haya ni "Miaka 62 ya uhuru Umoja na Mshikamano ni chachu ya Maendeleo ya Taifa"