MIRADI YOTE YA MAPATO YA NDANI IMEPELEKEWA FEDHA.

Posted on: April 23rd, 2025

Mwenyekiti wa Halmashauri ya Wilaya ya Missenyi Mhe. Projestus Tegamaisho amesema kwamba mpaka kufikia mwezi Februari, 2025 fedha zote za miradi inayotekelezwa kupitia 60% ya mapato ya ndani zilishapelekwa kwa asilimia 100.

Amebainisha hayo leo Aprili 23, 2025 wakati wa ziara ya Kamati ya Fedha, Utawala na Mipango ya kukagua utekelezaji wa miradi ya maendeleo katika robo ya tatu ya mwaka wa fedha 2024/25.

"Kwa mwaka wa fedha unaondelea tulitenga bilioni 3.7 kwa ajili ya miradi ya maendeleo na tumeshapeleka zote mpaka kufikia mwezi Februari na leo tupo katika ukaguzi wa miradi ili kuona maendeleo ya miradi pamoja na thamani ya fedha" Amesema Tegamaisho

Aidha, amesisitiza kwamba miradi yote iliyotembelewa kwa siku ya leo inaendelea vizuri na thamani ya fedha inaonekana na amewapongeza wasimamizi wote kwa kuhakikisha miradi inajengwa katika ubora unaotakiwa.

Katika ziara ya leo Kamati imefika katika Tarafa ya Kiziba na kukagua miradi mitatu yenye thamani ya shilingi milioni 125 kutoka mapato ya ndani ya Halmashauri ambapo milioni 35 zilitengwa kwaajili ya ukamilishaji wa Bwalo la Chakula katika shule ya Sekondari Buyango, milioni 50 zilitengwa kwaajili ya ujenzi wa nyumba ya watumishi ya 03 in 01 kwa awamu ya kwanza katika kituo cha afya Kanyigo na milioni 40 zilitengwa kwaajili ya Bweni la wanafunzi katika shule ya sekondari ya Gera.

Ziara hiyo ya Kamati ya Fedha, Utawala na Mipango itaendele kesho katika Tarafa ya Missenyi kwa kukagua miradi yenye thamani ya shilingi milioni 346.

Miradi aliyotaja Mhe. Tegamaisho ambayo itakaguliwa kwa siku ya pili katika tarafa ya Missenyi ni pamoja na Ujenzi wa Vibanda 17 katika Stendi ya Kyaka kwa shilingi milioni 90, Ukamilishaji wa Maabara tatu katika Shule ya sekondari Kilimilile kwa shilingi milioni 46, Ujenzi wa nyumba ya watumishi katika Zahanati ya Kashaba kwa shilingi milioni 50 na mradi mmoja kutoka Serikali Kuu wa Ujenzi wa nyumba za watumishi wa makao makuu ya Halmashauri zenye thamani ya shilingi milioni 160.