MIRADI YENYE THAMANI YA SHILINGI BILIONI 26.3 KUMULIKWA NA MWENGE WA UHURU 2023 MKOANI KAGERA.

Posted on: August 8th, 2023

Mheshimiwa Mkuu wa Mkoa wa Kagera Hajjat Fatma Mwasa leo tarehe 08/08/2023 amewaongoza wananchi wa Mkoa wa Kagera kupokea Mwenge wa Uhuru katika Wilaya ya Muleba ukitokea Mkoa wa Geita.

Mwenge wa umepokelewa Kimkoa katika viwanja vya Shule ya Sekondari Nyakabango katika kata ya Nyakabango Wilayani Muleba kutoka kwa Mkuu wa Mkoa wa Geita Mhe. Martine Shigella na kisha Mhe. Mwassa kukabidhi Mwenge wa Uhuru kwa Mkuu wa Wilaya ya Muleba Dkt. Abel Mwendawile Nyamahanga  kwa ajili ya kuanza kukimbizwa Wilayani humo ikiwa ni Wilaya ya kwanza katika mkoa wa kagera kuanza kukimbiza Mwenge wa Uhuru kwa mwaka 2023.

Mwenge wa uhuru ukiwa Mkoani Kagera unatarajia kuakagua, kutembelea, kuweka mawe ya msingi na kuzindua miradi ya Maendeleo 57 yenye thamani ya shilingi bilioni 26.3 katika Halmashauri za Mkoa wa Kagera.

Aidha, Mhe. Mkuu wa Mkoa wa Kagera alibainisha kwamba , Mwenge wa uhuru unaanzia katika  Halmashauri ya Wilaya ya Muleba na kufuatiwa na Bukoba Manispa, Bukoba Vijijini, Missenyi, Kyerwa, Karagwe, Ngara na kutarajia kuhitimisha mbio zake katika Halmashauri ya Wilaya ya Biharamulo mnamo tarehe 15 Agosti,2023.

Ikumbukwe kwamba Mwenge wa Uhuru utapokelewa Wilaya ya Missenyi tarehe 11 Agosti, 2023 katika Kata ya Gera ukitokea Bukoba Vijijini.

Karibu Mwenge wa Uhuru 2023 Wilaya ya Missenyi.